खोज

काठमाडौँ । प्रधानमन्त्री केपी शर्मा ओलीसँग एसियाकै प्रतिष्ठित लगानी समूह सर्वना जुरोङ ग्रुप का कार्यकारी प्रमुख सिन चाओ नेतृत्वको टोलीले नेपालमा पूर्वाधार र सहरी विकासका क्षेत्रमा लगानी विस्तारबारे छलफल गरेको छ।

प्रधानमन्त्री निवास बालुवाटारमा सम्पन्न भेटमा कार्यकारी प्रमुख सिनले ऊर्जा, पर्यटन, रेल, सुरुङमार्ग, स्मार्ट सिटी, एक्सप्रेस-वे लगायतका परियोजनाहरूमा लगानीको इच्छा व्यक्त गरे। सिङ्गापुर सरकारको स्वामित्वमा रहेको तेमासेक समूह अन्तर्गत कार्यरत उक्त कम्पनीले नेपालमा कार्यालय स्थापना गरिसकेको छ।

प्रधानमन्त्री ओलीले ‘समृद्ध नेपाल, सुखी नेपाली’ लक्ष्य हासिल गर्न प्रतिष्ठित अन्तर्राष्ट्रिय लगानीकर्तासँग सहकार्यको आवश्यकता रहेको बताउँदै, नेपालमा लगानीका लागि सहज वातावरण सिर्जना गरिने उल्लेख गरे। साथै, सिङ्गापुरको द्रुत विकासलाई उदाहरण दिँदै, सर्वना समूहको अनुभव नेपालका लागि उपयोगी हुन सक्ने विश्वास व्यक्त गरे।

प्रधानमन्त्री ओलीले विकास बिना समृद्धि सम्भव नभएको उल्लेख गर्दै, सरकारको नीति जनमुखी, पारदर्शी र लगानीमैत्री रहेको स्पष्ट पारे। उनले भने, “हामी भ्रष्टाचारका लागि कुनै काम गर्दैनौँ, देशलाई समृद्ध बनाउने हाम्रो अठोट छ। तपाईंहरू जस्ता संस्थालाई आवश्यक कानुनी र संरचनात्मक सुधार गर्न सरकार तयार छ।”

छलफलमा लगानी बोर्ड नेपालका प्रमुख कार्यकारी अधिकृत सुशील ज्ञवाली, सर्वना ग्रुपका प्रशासकीय प्रमुख सु मिन, नेकपा (एमाले) सहरी विकास विभाग प्रमुख शेरबहादुर तामाङ, दक्षिण एसिया प्रमुख अभिनास मिश्रा, नेपाल प्रमुख विलास कोइरालालगायतको उपस्थिति रहेको थियो।