१६ जेठ २०८३ काठमाडौँ । नेपाल सरकारको अर्थ मन्त्रालय र अर्थमन्त्री डा. स्वर्णिम वाग्लेले संघीय संसद्को संयुक्त बैठकमा आगामी आर्थिक वर्ष २०८३/८४ का लागि कुल रु २१ खर्ब २४ अर्ब ३४ करोडको बजेट प्रस्तुत गरेसँगै देशभित्र यसको पक्ष र विपक्षमा व्यापक बहस सुरु भएको छ। बजेटलाई लिएर विभिन्न दृष्टिकोण सार्वजनिक भइरहेका बेला प्रधानमन्त्री बालेन्द्र शाह (बालेन)ले सामाजिक सञ्जालमा राख्नुभएको दुई शब्दको स्टाटस ‘ढुक्क हुनुस् !’ यतिबेला इन्टरनेटमा सबैभन्दा धेरै लाइक, कमेन्ट र सेयरसहित भाइरल बनेको छ।
संसद्मा बजेट प्रस्तुत भएपछि विभिन्न राजनीतिक दल र अर्थविद्हरूबाट भिन्न-भिन्न प्रतिक्रिया आइरहेका छन्। समर्थकहरूले यस बजेटलाई देशको आर्थिक रूपान्तरणका लागि ‘स्वर्णिम (सोडिम) युगको सुरुवात’ को रूपमा व्याख्या गरेका छन्। बजेटमा आयकरको सीमा दोब्बर बनाइएको, राष्ट्रसेवक कर्मचारीहरूको तलब २१ प्रतिशतले वृद्धि गरी न्यूनतम रु ४०,००० पुर्याइएको, र ३६० भन्दा बढी वस्तुको अन्तःशुल्क खारेज गर्दै कर प्रणालीलाई जनमुखी बनाइएको दाबी गरिएको छ। साथै, सूचना प्रविधि क्षेत्रलाई प्राथमिकता दिँदै ‘सार्वभौम एआई कम्प्युटिङ सेन्टर’ स्थापना र स्टार्टअपका लागि रु ७३ करोडको सहुलियतपूर्ण ऋण जस्ता युवा लक्षित कार्यक्रमहरू बजेटमा समेटिएका छन्।
तर, प्रतिपक्ष र कतिपय विश्लेषकहरूले भने यो बजेटलाई ‘असाध्यै महत्त्वाकाङ्क्षी र कार्यान्वयन गर्न कठिन’ भन्दै आलोचना गरेका छन्। देशको कमजोर पुँजीगत खर्च गर्ने क्षमताका कारण ७ प्रतिशतको आर्थिक वृद्धिको लक्ष्य भेट्टाउन असम्भव रहेको र यसले बजारमा ऋणको भार मात्र बढाउने दाबी उनीहरूको छ।
बजेटलाई लिएर संसदभित्र र बाहिर बहस चलिरहेकै समयमा प्रधानमन्त्री बालेन्द्र शाहले फेसबुक मार्फत जनतालाई आश्वस्त पार्ने प्रयास गरेका छन्। उनले आफ्नो आधिकारिक पेजमा “ढुक्क हुनुस् !” भनी लेखेको छोटो स्टाटसले सामाजिक सञ्जालमा तरङ्ग पैदा गरेको छ। युवाहरूको अभूतपूर्व समर्थनबाट सत्ताको नेतृत्वमा पुगेका प्रधानमन्त्री शाहको यो पोष्टलाई आम नागरिकले देशमा व्याप्त बेरोजगारी र आर्थिक शिथिलता अन्त्य गर्ने दरो प्रतिबद्धताका रूपमा बुझेका छन्।
सामाजिक सञ्जालका लाखौँ प्रयोगकर्ताहरूले प्रधानमन्त्रीको पोस्टमा प्रतिक्रिया दिँदै देशमा आर्थिक क्रान्ति र सुशासन आउनेमा आफूहरू विश्वस्त रहेको बताएका छन् भने कतिपयले सरकारलाई बजेटमा गरिएका घोषणाहरू कागजमा मात्र सीमित नराखी व्यवहारमा उतारेर देखाउन चुनौती समेत दिएका छन्। बजेटको यो महत्त्वाकाङ्क्षी खाका र प्रधानमन्त्रीको दृढताले देशलाई कता लैजान्छ भन्ने कुरा अबका दिनमा हुने कार्यान्वयनको गतिले नै तय गर्ने देखिन्छ।
