खोज

झापा : नेकपा (माओवादी केन्द्र) दमक नगर कमिटीले ‘१ लाख फलफुलका बिरुवा’ रोप्ने दीर्घकालीन अभियान अन्तर्गत ‘ग्रीन दमक, क्लिन दमक’ नारासहित दोस्रो चरणको वृक्षरोपण कार्यक्रम आजदेखि सुरु गरेको छ।

दमक–३ स्थित बेलडाँगी क्षेत्रमा २,००० बिरुवा रोपेर अभियानको प्रारम्भ गरिएको नेकपा माओवादी केन्द्रका केन्द्रीय सदस्य तथा झापा जिल्ला इन्चार्ज रञ्जित तामाङले पब्लिक सवाललाई जानकारी दिए । उद्घाटनको क्रममा नेता तामाङले प्रकृतिको संरक्षण, मौलिक उत्पादनको प्रवर्द्धन, र नयाँ पुस्तालाई लक्षित गर्दै पर्यटनको सम्भावनालाई जोड्न वृक्षरोपणले महत्त्वपूर्ण योगदान पुर्‍याउने बताए।

यसअघि माओवादी केन्द्रले ‘एक घर, दुई बिरुवा’ अभियान सञ्चालन गर्दै अघिल्लो वर्ष ‘एक घर, एक कागती र एक लिची’को नारा अनुरूप करिब ५० हजार बिरुवाको वितरण गरेको थियो। सोही प्रयासको निरन्तरतामा यस वर्ष अभियानलाई थप व्यावस्थित र प्रभावकारी बनाइएको जनाइएको छ।

स्थानीय तह, विभिन्न सामुदायिक संस्था र युवा स्वयंसेवकहरूको सक्रिय सहभागितामा यो अभियानलाई समग्र नगर क्षेत्रभर फैलाउने योजना गरिएको छ। अभियानको लक्ष्य केवल हरियाली बढाउनु मात्र नभई, स्वच्छ वातावरण निर्माण, आन्तरिक पर्यटन प्रवर्द्धन तथा आर्थिक आत्मनिर्भरतातर्फ जनजागरण ल्याउनु पनि रहेको आयोजकले बताएका छन्।

दमकलाई हरियाली र स्वच्छतामा उदाहरणीय बनाउने लक्ष्यसहित अघि बढाइएको अभियानप्रति स्थानीयवासी तथा युवाहरूमा उल्लेख्य उत्साह देखिएको छ।