खोज

काठमाडौं । संस्कृति, पर्यटन तथा नागरिक उड्डयनमन्त्री बद्रीप्रसाद पाण्डेले नेपाल हवाई सेवा प्राधिकरणको स्थापनासम्बन्धी विधेयक प्रणाली सुदृढीकरणका लागि ल्याइएको स्पष्ट पारेका छन्। आइतबार प्रतिनिधिसभाको बैठकमा विधेयकको सैद्धान्तिक छलफलमा सांसदहरूले उठाएका जिज्ञासाहरूको जवाफ दिँदै मन्त्री पाण्डेले संस्थालाई टुक्र्याउने होइन, प्रणालीलाई बलियो बनाउने उद्देश्य विधेयकको मूल मर्म रहेको बताए। विधेयकले दक्ष जनशक्ति निर्माण, प्रभावकारी कार्यान्वयन र नेपालको अन्तर्राष्ट्रिय हवाई छविलाई सुदृढ बनाउने दिशामा केन्द्रित छ,” मन्त्री पाण्डेले भने, “संस्थागत संरचनाको टुक्र्याउने आशंका निराधार छ। हामी नेपालको हवाई सुरक्षालाई नयाँ उचाइमा पुर्‍याउने लक्ष्यमा छौं।

मन्त्री पाण्डेले नियामक निकायको विषयमा संसद्मा थप छलफल गरिने जानकारी दिँदै नेपालको आकाशलाई गतिशील र सुरक्षित बनाउन साझा प्रयास आवश्यक रहेको धारणा राखे। “माननीय सांसदज्यूहरूको राय र सल्लाहका आधारमा विधेयकमा आवश्यक परिमार्जन गर्दै जान्छौं,” उनले प्रतिवद्धता जनाए।

साथै, नागरिक उड्डयन क्षेत्रको सुधारका लागि सर्वोच्च अदालतका पूर्वन्यायाधीश अनिल सिन्हाको नेतृत्वमा उच्चस्तरीय संयन्त्र गठन गरिएको र त्यस संयन्त्रमार्फत बृहत छलफल जारी रहेको पनि मन्त्री पाण्डेले उल्लेख गरे।

नेपालको हवाई सुरक्षालाई अन्तर्राष्ट्रिय मापदण्डमा अभिवृद्धि गर्ने उद्देश्यले ल्याइएको यो विधेयकले दीर्घकालीन रूपमा नेपालको पर्यटन तथा उड्डयन क्षेत्रमा सकारात्मक प्रभाव पार्ने अपेक्षा गरिएको छ।