काठमाडौँ । सरकारले राष्ट्रिय ध्वजावाहक नेपाल वायुसेवा निगम (नेवानि) को कार्यकारी अध्यक्ष तथा महाप्रबन्धकको जिम्मेवारी वरिष्ठ उड्डयन तथा पर्यटन विज्ञ महेश्वरभक्त श्रेष्ठलाई दिएको छ। मन्त्रिपरिषद्को मंगलबार बसेको बैठकले श्रेष्ठलाई कार्यकारी अध्यक्ष तथा महाप्रबन्धकको जिम्मेवारीसहित नियुक्त गरेको सरकारका प्रवक्ता, सञ्चार तथा सूचना प्रविधिमन्त्री सस्मित पोखरेलले जानकारी दिए।
लामो समयदेखि थला परेको राष्ट्रिय ध्वजावाहकलाई उकास्न सरकारले एक योग्य र निष्कलङ्क छविका विज्ञलाई भित्र्याएपछि संस्कृति, पर्यटन तथा नागरिक उड्डयन मन्त्री खडकराज पौडेलले उच्च सम्मानसहित फेसबुकमार्फत उनलाई विशेष शुभकामना दिएका छन्। विगतमा संस्थाको हितका लागि सरकारकै गलत निर्णयविरुद्ध उभिने आँट गरेका श्रेष्ठको बुढ्यौली उमेर, तर समृद्ध विचार र नैतिकताको कदर गर्दै मन्त्री पौडेलले उनीबाट निगमले सुधारको ठूलो आशा राखेको सामाजिक सञ्जालमा उल्लेख गरेका हुन्।
नवनियुक्त कार्यकारी अध्यक्ष श्रेष्ठलाई बधाई दिने क्रममा मन्त्री पौडेलले आफ्नो फेसबुक अकाउन्टमा निगमको इतिहासकै सबैभन्दा विवादित र चर्चित ‘धमिजा काण्ड’ लाई स्मरण गर्दै सो काण्डको समयमा श्रेष्ठले देखाएको व्यावसायिक निष्ठा र साहसिक कदमको प्रशंसा गर्दै फेसबुकमा लेखेका छन्:
“राष्ट्रिय ध्वजाबाहकको जिन्दगीमा लागेको पहिलो धमिरा थियो धमिजा काण्ड । धमिजा काण्डको बेलैदेखि सरकारकै निर्णय विरुद्धमा उभिने आँट गरेका व्यक्ति हुनुहुन्थ्यो तपाईँ । मेरो उमेरभन्दा लामो अनुभव भएका तर नेवानिलाई नउकासी बिश्राम नलिने अमर्ख लिएको वयले वृद्ध तर विचार र नैतिकताले समृद्ध व्यक्ति हुनुहुन्छ तपाईँ । तपाईँबाट मैले ठुलो आशा गरेको छु !”
मन्त्रीको यो फेसबुक अभिव्यक्तिले श्रेष्ठ राजनीतिक दबाब र गलत निर्णयसामु नझुक्ने एक बलियो र नैतिकवान् संवाहक हुन् भन्ने कुरालाई फेरि प्रमाणित गरिदिएको छ।
पाँच दशकको अनुभव र परामर्श क्षेत्रमा योगदान दिएका नवनियुक्त कार्यकारी अध्यक्ष श्रेष्ठ नेपाल र दक्षिण एसियामै एयरलाइन, उड्डयन र पर्यटन व्यवस्थापनका वरिष्ठ परामर्शदाताका रूपमा स्थापित छन्। सन् १९८५ यता उनले नेपाल नागरिक उड्डयन प्राधिकरण, नेपाल पर्यटन बोर्ड, एसियाली विकास बैंक (ADB), राष्ट्रिय योजना आयोग, संस्कृति, पर्यटन तथा नागरिक उड्डयन मन्त्रालय एवं नेपाल वायुसेवा निगमलगायतका विभिन्न निकायहरूका लागि नीति निर्माण, रणनीतिक योजना, विमान बेडा (फ्लिट) योजना, पर्यटन विकास तथा संस्थागत सुधारका दर्जनौँ परामर्श परियोजनाहरूमा काम गरिसकेका छन्।
विशेष गरी निगमको १० वर्षे फ्लिट योजना तयार पार्ने, बोइङ–७५७ खरिद मूल्याङ्कन समितिको सदस्य-सचिवको जिम्मेवारी निर्वाह गर्ने, ‘नेपाल पर्यटन वर्ष २०११’ को रणनीतिक योजना तयार पार्ने तथा राष्ट्रिय नागरिक उड्डयन नीति पुनरावलोकनमा समेत उनको महत्त्वपूर्ण भूमिका रहेको थियो।
श्रेष्ठ शैक्षिक, साहित्यिक र अनुसन्धानको क्षेत्रमा पनि उत्तिकै सक्रिय छन्। उनले नागरिक उड्डयन, पर्यटन, हवाई सेवा व्यवस्थापन, हवाई भाडा निर्धारण, एयर कार्गो, फ्लिट योजना, सार्वजनिक संस्थान व्यवस्थापन तथा पर्यटन विकासका विषयमा चार दशकभन्दा बढी समयदेखि विभिन्न राष्ट्रिय तथा अन्तर्राष्ट्रिय जर्नल र पत्रपत्रिकाहरूमा दर्जनौँ अनुसन्धानमूलक लेखहरू प्रकाशित गर्दै आएका छन्।
काठमाडौँ उपत्यका खानेपानी लिमिटेड (KUKL) का पूर्वस्वतन्त्र सञ्चालकसमेत रहिसकेका श्रेष्ठ सन् १९८० देखि लन्डनस्थित प्रतिष्ठित ‘चार्टर्ड इन्स्टीट्युट अफ ट्रान्सपोर्ट’ (Chartered Institute of Transport) को सदस्यसमेत रहँदै आएका छन्।
यसअघि सन् २००० मा उनले प्रकाशित गरेको ‘नेप्लिज एभियसन एन्ड टूरिजम’ पुस्तक पूर्वाञ्चल विश्वविद्यालयको पर्यटन अध्ययनको स्नातकोत्तर (Masters) तहमा सन्दर्भ पुस्तकका रूपमा अध्यापन गराइँदै आएको छ। त्यस्तै, सन् २०२३ मा प्रकाशित नेपालको पहिलो व्यावसायिक पाइलट क्याप्टेन बबीविक्रम शाहको जीवनीमा आधारित ‘अ म्यान विथ अ मिसन: LIFE AND TIMES OF CAPT. BOBBY BIKRAM SHAH’ पुस्तकका उनी सहलेखक समेत हुन्।
उनले निगममा करिब २५ वर्ष विभिन्न महत्त्वपूर्ण जिम्मेवारी सम्हालेका थिए। श्रेष्ठले सन् १९७५ देखि १९८५ सम्म कर्पोरेट योजना प्रमुख तथा सन् १९८५ देखि १९९२ (वि.सं २०४९) सम्म कर्पोरेट, Marketting तथा बिक्री र कमर्सियल विभागको निर्देशक (कर्पोरेट निर्देशक) का रूपमा नेतृत्व गरेका थिए।
उनी बेलायतको युनिभर्सिटी अफ वेस्टमिन्स्टरबाट सन् १९७९ मा एयर ट्रान्सपोर्टमा विशेषज्ञतासहित ट्रान्सपोर्ट एन्ड डेभलपमेन्टमा स्नातकोत्तर डिप्लोमा प्रथम श्रेणीमा प्रथम स्थान हासिल गरी उत्तीर्ण गर्ने विज्ञ हुन्। त्रिभुवन विश्वविद्यालयबाट वाणिज्यशास्त्रमा स्नातकोत्तर गरेका श्रेष्ठले क्यानडाको म्याकगिल विश्वविद्यालय, भारतको एडमिनिस्ट्रेटिभ स्टाफ कलेज र अमेरिकाको म्याकडोनेल डगलसलगायत प्रतिष्ठित संस्थाहरूबाट उड्डयन व्यवस्थापनसम्बन्धी उच्चस्तरीय तालिम लिएका छन्।
मन्त्रालय र आम नागरिकको ठुलो भरोसा बोकेका नवनियुक्त अध्यक्ष श्रेष्ठले आफ्नो कार्यकालमा निगमलाई व्यावसायिक रूपमा सबल बनाउने, कम्पनी मोडलमा रूपान्तरण गर्ने र आगामी ३ वर्षभित्र संस्थालाई पूर्ण रूपमा ऋणमुक्त बनाउने प्राथमिक योजना अघि सारेका छन्। पर्यटन मन्त्री खडकराज पौडेलको पूर्ण भरोसा र सरकारको बलियो साथ पाएका श्रेष्ठको यो ‘सेकेन्ड इनिङ्स’ ले नेपाल एयरलाइन्सको आकाशमा सुखद दिनहरू फर्काउने विश्वास गरिएको छ
