खोज

काठमाडौं। मर्चेन्ट बैंकर्स एसोसिएसन अफ नेपाल (एमब्यान) ले आयोजना गर्न लागेको ‘एमब्यान स्पोर्ट्स मिट २०२६’ को पूर्व–कार्यक्रम अन्तर्गत पत्रकार सम्मेलन तथा आधिकारिक ड्र कार्यक्रम बिहीबार धुम्बाराहीस्थित धन्वन्तरी स्पोर्ट्स हबमा सम्पन्न भएको छ।
एमब्यानका कार्यसमिति सदस्य सन्दीप कार्की को उपस्थितिमा सम्पन्न कार्यक्रममा सहभागी संस्थाका टोली प्रमुख, खेलाडी, प्रतिनिधि, आयोजक समितिका सदस्य तथा सञ्चारकर्मीहरूको उल्लेखनीय सहभागिता रहेको थियो।
कार्यक्रममा आयोजक समितिले प्रतियोगिताको उद्देश्य, खेलको ढाँचा, समयतालिका तथा व्यवस्थापनसम्बन्धी विस्तृत जानकारी गराएको थियो। साथै फुटसल, ब्याडमिन्टन र टेबलटेनिस प्रतियोगिताका लागि आधिकारिक ड्र सम्पन्न गर्दै खेल तालिका र प्रतिस्पर्धात्मक संरचनालाई अन्तिम रूप दिइएको जनाएको छ।
प्रतियोगिताअन्तर्गत पुरुष फुटसलमा १८ टोली सहभागी हुनेछन्, जसलाई तीन–तीन टोली रहने गरी ६ समूहमा विभाजन गरिएको छ। महिला फुटसलमा ८ टोलीलाई दुई समूहमा विभाजन गरिएको छ। त्यसैगरी ब्याडमिन्टनतर्फ पुरुष डबल्समा ५ टोली, महिला डबल्समा ६ टोली तथा भेट्रान्स डबल्समा २ टोलीले प्रतिस्पर्धा गर्नेछन्।
टेबलटेनिसतर्फ पुरुष एकलमा १४ खेलाडी, महिला एकलमा ५ खेलाडी र भेट्रान्स एकलमा ५ खेलाडीको सहभागिता रहने आयोजकले जनाएको छ।
एमब्यान स्पोर्ट्स मिट २०२६ आगामी असार २० र २१ (जुलाई ४ र ५) मा धुम्बाराहीस्थित धन्वन्तरी स्पोर्ट्स हबमा आयोजना हुनेछ।
आयोजकका अनुसार प्रतियोगिताले मर्चेन्ट बैंकिङ क्षेत्रका सदस्य संस्थाबीच खेलकुदको माध्यमबाट आपसी सद्भाव, टोलीगत कार्यसंस्कृति, स्वस्थ प्रतिस्पर्धा तथा व्यावसायिक सम्बन्धलाई थप सुदृढ बनाउने अपेक्षा गरिएको छ। यस्ता कार्यक्रमले संस्थागत सहकार्य, कर्मचारीबीचको समन्वय र व्यावसायिक नेटवर्क विस्तारमा समेत सकारात्मक योगदान पुग्ने विश्वास व्यक्त गरिएको छ।
एमब्यानले प्रतियोगिताको सफल आयोजनाका लागि सहभागी संस्था, खेलाडी, पदाधिकारी, प्रायोजक तथा सञ्चारमाध्यमप्रति आभार व्यक्त गर्दै प्रतियोगिताको सफलताको शुभकामना व्यक्त गरेको छ।