खोज

काठमाडौं । नेपालमा बीमा उद्योगको दिगो विकास, स्थायित्व, र विस्तारलाई केन्द्रमा राख्दै बैंकिङ्ग समाचार डटकम र बीमा प्राधिकरणको संयुक्त आयोजनामा ‘द नेशनल इन्स्योरेन्स डिस्कोर्श २०२५’ आयोजना हुँदैछ। रिलायबल लाइफ इन्स्योरेन्सको मुख्य प्रायोजनमा काठमाडौंको मेरियट होटलमा पुस २५ गते आयोजना हुने यस कार्यक्रमको उद्घाटन अर्थमन्त्री विष्णुप्रसाद पौडेलले गर्नुहुनेछ।

कार्यक्रम दिउँसो १२:३० बजे सुरु हुने छ। चारवटा सत्रमा विभाजित यस डिस्कोर्शमा जीवन बीमा, निर्जीवन बीमा, पुनर्बीमा, र बीमा क्षेत्रमा प्रविधिको प्रयोगसम्बन्धी विषयमा व्यापक छलफल गरिनेछ। बीमा प्राधिकरण र अर्थमन्त्रालयका प्रतिनिधिहरूसँगै प्रमुख कार्यकारी अधिकृत र अन्य विज्ञहरूको सहभागीता रहनेछ। भारतबाट दुईजना बीमा विज्ञहरूले समेत आफ्नो प्रस्तुति दिनेछन्।

बीमा उद्योगको दिगो विकास र ग्रामीण तहसम्म बीमाको पहुँच विस्तारका लागि बैंकिङ्ग समाचारले २०८० सालदेखि इन्स्योरेन्स डिस्कोर्श सुरु गरेको हो। पहिलो संस्करण २०८० साल भदौ १८ गते काठमाडौंको सोल्टी होटलमा सम्पन्न भएको थियो। उक्त अवसरमा बीमा व्यवसायले सामना गरिरहेका समस्या, चुनौतीहरू, र विस्तारमा देखिएका अवरोधबारे गहन छलफल भएको थियो।

पहिलो डिस्कोर्शबाट प्राप्त निष्कर्षलाई प्रतिवेदनकारुपमा तयार गरी अर्थमन्त्रालय र बीमा प्राधिकरणलाई बुझाइएको थियो। यसले नीति निर्माण, व्यवसायको विस्तार, र दिगो प्रबर्द्धनमा महत्त्वपूर्ण योगदान पुर्याएको आयोजकले जनाएको छ।

दोस्रो संस्करणको डिस्कोर्शले विशेषतः प्रविधिको उपयोगमार्फत बीमा उद्योगमा नयाँ आयामहरू थप्ने लक्ष्य राखेको छ। जीवन बीमा र निर्जीवन बीमाका सत्रहरूले नवप्रवर्तन, पुनर्बीमा रणनीति, र ग्रामीण क्षेत्रमा बीमाको पहुँच सुनिश्चित गर्न आवश्यक पहलका विषयमा छलफल गर्नेछन्।

बीमा उद्योगमा संलग्न निजी र सरकारी क्षेत्रबीच सहकार्यका नयाँ आयामहरू प्रस्तुत गर्दै दिगो आर्थिक विकासका लागि ‘द नेशनल इन्स्योरेन्स डिस्कोर्श २०२५’ ले महत्त्वपूर्ण भूमिका खेल्ने विश्वास गरिएको छ। अर्थशास्त्रीय, राजनीतिक, र कानुनी दृष्टिकोणबाट कार्यक्रमले बीमाको दायरा विस्तार गर्दै यसको प्रभावकारिता वृद्धि गर्ने अपेक्षा गरिएको छ।

डिस्कोर्शबाट प्राप्त निष्कर्षहरूलाई प्रतिवेदनकारूपमा तयार गरी सम्बन्धित निकायहरूमा बुझाइनेछ। यसले भावि दिनमा बीमा क्षेत्रको नीति निर्माण र व्यवसाय प्रबर्द्धनमा सहयोग पुर्याउने आयोजकको अपेक्षा छ।

बीमा क्षेत्रमा सकारात्मक परिवर्तन ल्याउन ‘द नेशनल इन्स्योरेन्स डिस्कोर्श २०२५’ एक महत्वपूर्ण मञ्च हुनुका साथै यसले बीमा व्यवसायलाई दिगो, समावेशी, र प्रविधिमैत्री बनाउने दिशामा ठोस कदम अघि बढाउने विश्वास गरिएको छ।