खोज

काठमाडौ । नेकपा (माओवादी केन्द्र)का अध्यक्ष तथा पूर्व प्रधानमन्त्री पुष्पकमल दाहाल ‘प्रचण्ड’ले पार्टीभित्र फैलिँदै गएको पदको लोभ र स्वार्थको प्रवृत्तिप्रति गहिरो चिन्ता प्रकट गरेका छन्। विचार, प्रतिबद्धता र वर्गीय दृष्टिकोणभन्दा माथि उठेर सत्ताको भोक र आत्मकेन्द्रित दौड सुरु भएको भन्दै उनले चेतावनी दिएका हुन्।

शनिबार काठमाडौँमा आयोजित दिवंगत केन्द्रीय सल्लाहकार कृष्णलाल गोजा श्रेष्ठको श्रद्धाञ्जली सभालाई सम्बोधन गर्दै अध्यक्ष दाहालले भने,
“हिजोका दिनमा आदर्श, त्याग र वर्गीय मुक्तिको सपना बोकेर अगाडि बढेका थियौं, तर आज त्यो संकल्प ओझेलमा परेको छ। सबैभन्दा दुःखको कुरा – स्वार्थ र पदका लागि तँछाडमछाडको दृश्य छरपस्ट देखिन्छ।”

उनले माओवादी आन्दोलनले केही समय वर्गीय आधारबाट विचलन भएको स्वीकार गरे तापनि अहिले पुनः वर्गीय दृष्टिकोणमा फर्किन थालेको उल्लेख गरे। “पार्टी रूपान्तरणको अभियान जारी छ, तर सैद्धान्तिक, राजनीतिक, व्यावहारिक र सांस्कृतिक मोर्चामा देखिएका विचलन गम्भीर चिन्ताको विषय बनेका छन्,” उनले स्पष्ट पारे।

प्रचण्डले आफ्ना सिपाही सहकर्मी स्व. गोजा श्रेष्ठको स्मरण गर्दै त्यस प्रकारको सिद्धान्तनिष्ठ, सरल र समर्पित नेतृत्वको आवश्यकता अझै मौलिक रहेको बताए।

आजको माओवादी आन्दोलनमा देखिएको अस्वस्थ प्रतिस्पर्धा, नेतृत्वको पारदर्शितामा खडेरी, र कार्यकर्ता-जनता बीचको दूरीको बढ्दो खाडलका बीच अध्यक्षको यस्तो चिन्ताले पार्टीभित्रको गहिरो असन्तुलन उजागर गरेको छ।

प्रचण्डको यो अभिव्यक्तिले माओवादी आन्दोलनलाई केवल इतिहास होइन, भविष्य पनि बनाउन सक्ने जिम्मेवारीबोधका साथ पुनः आत्मपरीक्षणमा लैजाने संकेत दिन्छ। प्रश्न अब यहीँ छ  के नेतृत्वले गम्भीर समीक्षा गर्दै त्यो वर्गीय बाटो फेरी समात्ला, या पदकै प्यासमा पार्टी फेरि दिशाविहीन बन्दछ?