खोज

काठमाडौं । अछामको कमलबजार नगरपालिका ५ स्थित पाँचुली जंगलमा अबैध तरिकाले गिट्टी तथा ढुङ्गा उत्खनन गरिरहेको पीके निर्माण सेवा प्रा.लिले काम रोकेको छ । अवैध रूपमा डोजर प्रयोग गरी कानुनविपरित वन विनास गरेको भन्दै स्थानीयले विरोध गरेपछि काम रोकेको हो ।

विगत केहि समयदेखि पीके निर्माण सेवा प्रा.लिले पाँचुली जंगलमा अवैध तरिकाले गिट्टी उत्खनन गरिरहेको थियो । अहिले अछाम जिल्ला अन्तर्गत गैरिटाड देखि बासकाँडासम्म सडक कालोपत्रे भइरहेको छ । यसप्रकारको विकासको कामलाई सहर्ष समर्थन गरेको तर विकासको नाममा विनास किमार्थ स्वीकार गर्न नसकिने स्थानीय अगुवा जीवन तिमिल्सैनाले बताए ।

“गैरिटाड कमलबजार सडकखण्ड अन्तर्गत पाँचुली चैतेपातल वनमा बाटोको क्षेत्राधिकारभन्दा पर पुगेर ढुङ्गा उत्खनन गरियो । उनले भने, “टेन्डर प्रक्रिया हुँदा वातावरण परिक्षणका पक्षहरुलाई समेत ख्याल गरिएको छैन । जसले निकट भविष्यमा ठुलो क्षति निम्तिने खतरा छ । ”

स्थानीयहरुले जिल्ला प्रशासन कार्यालय अछाम र जिल्ला वन कार्यालय अछामलाई तत्काल उक्त ठाउँमा अनुगमन गर्न पनि माग गरेका छन् । यता गिट्टी तथा ढुङ्गा उत्खनन गरिरहेको निर्माण सेवा प्रा.लिले भने सुरुमा सामुदायीक वन उपोभोक्ता समितिसँग सहमतिमा काम अगाडी बढाएको बताएको छ । पहिला समितमा सहमति भएको र अहिले केहिले विरोध गरेपछि काम रोकिएको प्रा.लिका लेखापाल सुरेश पुनले बताएका छन् ।

अहिले केहि स्थानीय तहले ठेकेदार कम्पनीमार्फत नदीजन्य पदार्थ गिट्टी, बालुवा, ढुङ्गा उत्खनन गर्ने गरेका छन् ।