खोज

काठमाडौं । उर्जा, जलस्रोत तथा सिंचाईमन्त्री दीपक खड्काको पहलमा मनसुनजन्य विपद्मा वेपत्ता भएका नागरिकका परिवारलाई क्षतिपूर्तिको व्यवस्था गरिएको छ। यस निर्णयसँगै विपद्का कारण अपूरणीय क्षति बेहोरेका परिवारले राहत पाउने सुनिश्चितता भएको छ।

विसं २०८० असार २ गतेको अविरल वर्षाले संखुवासभा, पाँचथर, ताप्लेजुङ, भोजपुरलगायतका जिल्लामा भीषण बाढी तथा पहिरो निम्त्याएको थियो। यस विपद्मा संखुवासभाको हेवाखोलामात्रै १९ जना नागरिक वेपत्ता भएका थिए। प्रतिनिधिसभा सदस्यसमेत रहनुभएका मन्त्री खड्काले वेपत्ता नागरिकको क्षतिपूर्तिका लागि निरन्तर सरकारको ध्यानाकर्षण गराउँदै आउनुभएको थियो।

यसै सन्दर्भमा, मन्त्री खड्काको पहलमा विसं २०८१ फागुन १२ गते बसेको मन्त्रिपरिषद्को बैठकले महत्वपूर्ण निर्णय गरेको छ। अब, यदि मनसुनजन्य विपद्मा वेपत्ता भएको व्यक्ति कम्तिमा १० दिनसम्म फेला नपरेको अवस्था प्रमाणित भएमा, जिल्ला विपद् व्यवस्थापन कोषमार्फत मृतकसरह राहत उपलब्ध गराइनेछ।

यस निर्णयसँगै विसं २०८० वैशाख १ गतेदेखि हालसम्मका मनसुनजन्य विपद्मा परी वेपत्ता भएका नागरिकका परिवारले कानुनी रूपमा क्षतिपूर्ति प्राप्त गर्ने व्यवस्था मिलाइएको छ। सरकारले लिएको यो निर्णयले पीडित परिवारलाई राहत मिल्नुका साथै संकटका क्षणमा राज्यको उत्तरदायित्व सुनिश्चित गरेको छ।