खोज

काठमाडौं । गणतन्त्र स्थापनासँगै अन्त्य भएको मानिएको राजतन्त्रको पुनरुत्थानबारे संसदमा चासो बढेको छ। नेकपा (माओवादी केन्द्र) का सांसद सुरेश आलेमगरले पछिल्ला गतिविधिप्रति सरकारको ध्यानाकर्षण गराउँदै गणतन्त्रको विकल्प राजतन्त्र हुन नसक्ने स्पष्ट पारेका छन्।

राष्ट्रिय सभाको आइतबार बसेको बैठकमा बोल्दै सांसद मगरले भने, “प्रतिगामी तत्वहरू सक्रिय भइरहेका छन्। २५० वर्ष पुरानो राजतन्त्रलाई आर्यघाटमा सेलाइसकेका थियौँ। तर, त्यसका भूतहरू फेरि बौरिएर राजतन्त्रको कुरा गर्दैछन्।”

उनले गणतन्त्रविरोधी गतिविधिहरूलाई समयमै नियन्त्रण गर्न सरकारलाई आग्रह गर्दै वर्तमान व्यवस्था सुदृढ बनाउन आवश्यक कदम चाल्नुपर्ने बताए।

पूर्वराजा ज्ञानेन्द्र शाहको हालका गतिविधिहरूलाई लिएर माओवादी केन्द्र, एकीकृत समाजवादी, र जनता समाजवादी पार्टीका सांसदहरूले सरकारको आलोचना गरेका छन्। उनीहरूले व्यवस्थाविरोधी आवाजहरूलाई नियन्त्रण गर्नुपर्ने धारणा राख्दै गणतन्त्रलाई बलियो बनाउन प्रभावकारी नीति ल्याउन सरकारलाई आग्रह गरेका छन्।

सांसदहरूले जनतामा बढ्दो असन्तुष्टि, सुशासनको अभाव, र सार्वजनिक सेवा प्रवाहमा देखिएका समस्याहरूलाई समाधान नगरे राजतन्त्रको चर्चा फेरि जीवित हुन सक्ने चेतावनी दिएका छन्।

नेपालको राजनीतिक इतिहासमा राजतन्त्र हटेसँगै संघीय लोकतान्त्रिक गणतन्त्रको स्थापना भए पनि केही पक्षहरूले पुनः राजसंस्थाको बहस अघि बढाइरहेको देखिन्छ। सांसद मगरसहित विभिन्न दलका नेताहरूले यसलाई लोकतन्त्र र गणतन्त्रको मूल्य–मान्यताविरुद्धको प्रयास भन्दै खण्डन गरेका छन्।
संसदमा उठेको यस विषयले पुनः एकपटक नेपालमा राजतन्त्रको सम्भाव्यता र गणतन्त्रको मजबूतीबारे गम्भीर बहस चुलिएको देखिन्छ।