खोज

महोत्तरी । नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ ले नेपाली जनताको बलबाट गलहत्याइएका सामन्ती प्रेतहरुले पुनः टाउको उठाउने प्रयास गरे जनताकै बलबाट समाप्त पारिने चेतावनी दिएका छन्। जनतासँग माओवादी, तराई मधेस जागरण अभियान अन्तर्गत महोत्तरीको सम्सी गाउँपालिकामा आयोजित खबरदारी सभालाई सम्बोधन गर्दै उनले नेपाली जनताले परास्त गरिसकेका तत्वहरुले कहिलेकाहीँ पुनः सक्रिय हुन खोज्ने गरेको बताए।

इतिहास पछाडि फर्कन नसक्ने भएकाले त्यस्ता सोच राख्न नहुने भन्दै अध्यक्ष प्रचण्डले प्राप्त अधिकारको रक्षा गर्दै प्रत्यक्ष निर्वाचित कार्यकारी प्रमुख र पूर्ण समानुपातिक निर्वाचन प्रणाली जस्ता अग्रगामी एजेन्डालाई अघि बढाउनुपर्ने उल्लेख गरे।

उनले कुनै पनि शासक वा राजा महाराजाले जनतालाई अधिकार नदिएको, बरु जनताले आफ्नै बलमा अधिकार प्राप्त गरेको स्मरण गराउँदै यसको रक्षा, प्रयोग र विकास गर्न माओवादी केन्द्रलाई बलियो बनाउनुपर्ने धारणा राखे।

अध्यक्ष प्रचण्डले मुलुक यथास्थितिमा चल्न नसक्ने भएकाले नयाँ आन्दोलनको आवश्यकता रहेको बताए। त्यसका लागि उत्पीडित तथा अपहेलित वर्ग–समुदायको घरघरमा पुग्नुपर्ने बताउँदै पार्टी गम्भीर आत्मसमीक्षासहित जनताको बीचमा आएको उल्लेख गरे।

उनले माओवादीले अघि बढाएको हुलाकी मार्ग केन्द्रित अभियानले दक्षिण नेपाललाई राज्यको मूल प्रवाहमा जोड्दै नयाँ राष्ट्रिय एकता कायम गर्न सहयोग गर्ने विश्वास व्यक्त गरे। प्रधानमन्त्रीका रूपमा २०७३ मा भारत भ्रमणका क्रममा भारतीय प्रधानमन्त्री नरेन्द्र मोदीसँग छलफल गरी हुलाकी मार्गको निर्माण प्रक्रिया अघि बढाएको जानकारी दिँदै उनले उक्त मार्ग तराई–मधेसको जीवनरेखा बन्ने बताए।

महोत्तरीको विकासलाई निरन्तर प्राथमिकतामा राख्दै अध्यक्ष प्रचण्डले जलेश्वरमा सुक्खा बन्दरगाह निर्माण, सिँचाइ सुविधा, भारतीय बाँधको असर न्यूनीकरण, मिटरव्याज पीडितको समस्या समाधान, शैक्षिक गुणस्तर सुधार तथा स्वास्थ्य सेवाको पहुँच विस्तारलाई प्राथमिकताका साथ अघि बढाइने बताए। साथै, मणिपाल कलेजले ओगटेको जग्गाको उपयोगबारे समेत पहल गरिने प्रतिबद्धता व्यक्त गरे।
पछिल्लो समय माओवादी जनताको बीचमा कम पुगेको भन्दै अध्यक्ष प्रचण्डले यसको फाइदा उठाएर मधेसवादी दलहरुले मधेसका जनतामा भ्रम सिर्जना गरेको आरोप लगाए। ती दलहरू अवसरवादी बनेको टिप्पणी गर्दै उनले यदि उनीहरू साँच्चिकै मधेसी जनताको पक्षमा छन् भने संघीयताको पक्षमा माओवादीले अघि बढाएको अभियानमा सहभागी हुन आग्रह गरे।