खोज

काठमाडौ । वन तथा वातावरण मन्त्री ऐनबहादुर शाहीले वनलाई समृद्धिसँग जोड्ने लक्ष्यसहित महत्वपूर्ण नीति निर्माणको प्रतिबद्धता जनाएका छन्। बागलुङको जैमिनी नगरपालिका–८ छिस्तीस्थित जनकल्याण माविको स्वर्ण महोत्सवको उद्घाटन समारोहमा बोल्दै उनले वनजन्य उत्पादनहरूको व्यवस्थापनलाई कानुनी रूपमा परिमार्जन गर्दै आर्थिक समृद्धिमा जोड्ने बताए।

उनले वर्तमान कानुनी अप्ठेरोपनका कारण उत्पादन भएका काठ खेर गइरहेको उल्लेख गर्दै, आवश्यक संशोधनमार्फत यसको प्रभावकारी व्यवस्थापनको पहल गरिने बताए। वनजङ्गलमा उपलब्ध काठ, जडिबुटी र अन्य स्रोतसाधनको व्यावसायिक उपयोगले राष्ट्रिय अर्थतन्त्रमा महत्वपूर्ण योगदान गर्ने मन्त्री शाहीको धारणा थियो।

वन्यजन्तुजन्य समस्याले कृषकहरूलाई पारेको समस्यालाई सरकारले गम्भीरतापूर्वक लिएको उल्लेख गर्दै मन्त्री शाहीले पहिलो चरणमा बाँदरलाई कृषि हानिकारक वन्यजन्तुका रूपमा लिएर किसानलाई क्षतिपूर्ति प्रदान गर्ने कार्यक्रम ल्याइने बताए। जैमिनी क्षेत्रमा बाँदर आतंकका कारण बसाइँसराइ समेत बढेको उल्लेख गर्दै उनले नगरपालिकाले निर्माण गर्ने भनिएको बाँदर बगैँचाका लागि मन्त्रालयले बजेट विनियोजन गर्ने प्रतिबद्धता व्यक्त गरे।

उनले जङ्गली जनावरहरूको बढ्दो आतंकप्रति सरकार सचेत रहेको उल्लेख गर्दै दीर्घकालीन समाधानका लागि समुचित नीति ल्याइने स्पष्ट पारे। साथै, शिक्षा क्षेत्रमा नैतिक शिक्षाको आवश्यकतामाथि जोड दिँदै उनले समाजको समृद्धि र विकासका लागि नैतिक आधार बलियो हुनुपर्ने बताए।

मन्त्री शाहीले वर्तमान सरकार आएपछि आर्थिक गतिविधिहरू तीव्र गतिमा अघि बढेको बताउँदै, रोकिएका विकास आयोजनाहरू पुनःसञ्चालनमा आएको दाबी गरे। कांग्रेस–एमाले गठबन्धनको सरकारले समृद्धिको मार्ग प्रशस्त गरिरहेको उल्लेख गर्दै उनले स्थायीत्व र आर्थिक उन्नतिका लागि सरकार क्रियाशील रहेको धारणा राखे।

वन व्यवस्थापन, कृषि सुरक्षा, शिक्षा सुधार तथा आर्थिक गतिशीलताका विविध पक्षमा मन्त्री शाहीले प्रस्तुत गरेका योजनाहरूले देशलाई दिगो समृद्धिको दिशामा अघि बढाउने उनको विश्वास रहेको छ।