खोज

काठमाडौ । नेकपा (माओवादी केन्द्र) का अध्यक्ष तथा पूर्वप्रधानमन्त्री पुष्पकमल दाहाल ‘प्रचण्ड’ ले नेपाली कांग्रेस र नेकपा (एमाले) लाई ‘भ्रष्टाचारी’ को संज्ञा दिँदै ती दलहरूलाई सडक, सदन, र स्थानीय तहमा पार्टीको प्रभाव विस्तार गरी ठेगान लगाइने चेतावनी दिएका छन्।

दोलखाको जिरीमा आयोजित ‘३०औं जनयुद्ध दिवस तथा नगरसम्मेलन’ मा सम्बोधन गर्दै उनले कांग्रेस र एमालेले संविधान संशोधनको नाममा जनताको उपलब्धि मास्ने षड्यन्त्र गरिरहेको आरोप लगाए। उनले भने, “चारैतिरबाट घेरा हालेर संविधान च्यात्न सकिन्छ कि भन्नेमा छन्। तर, जनताले पाएका अधिकारहरूलाई जोगाउँदै थप अधिकार सुनिश्चित गर्नुपर्छ। स्थिरता खोज्ने हो भने पुरानो निर्वाचन प्रणाली र शासन व्यवस्थाबाट सम्भव छैन।”

प्रचण्डले संविधान संशोधनको वास्तविक चाहना माओवादी केन्द्रको रहेको दाबी गर्दै कांग्रेस र एमालेले केवल सरकार बनाउने र आफ्ना स्वार्थपूर्ति गर्ने खेल खेलिरहेको आरोप लगाए। “कांग्रेस र एमालेको चासो संविधान सुधार गर्ने होइन, च्यात्ने हो। संविधानमा गरीब, श्रमिक, र उत्पीडित वर्गको अनुहार देखिन्छ, जुन उनीहरूलाई मन परेको छैन,” उनले भने।

उनले माओवादी केन्द्रले अब जनताको साथ लिएर शान्तिपूर्ण रूपमा सशक्त अभियान सञ्चालन गर्ने बताए। “अहिले भूमिगत हुने वा हतियार उठाउने अवस्था छैन। तर, सडक र सदनमार्फत प्रतिकार गर्नेछौं। माओवादीले जितेका १२३ स्थानीय सरकारमार्फत पनि भ्रष्टाचारीहरूलाई ठेगान लगाउनेछौं,” प्रचण्डले जोड दिए।

देशभर जनताले माओवादी केन्द्रलाई पुनः विश्वास गर्न थालेको उनको दाबी छ। “गुल्मी हुँदै बागमती र झापा जाँदैछु। जहाँ गए पनि जनताको समर्थन बढेको छ। बुद्धिजीवी, पत्रकार, नागरिक समाजका अगुवाहरूले ‘प्रचण्डलाई चिन्न ढिलो भयो’ भन्न थालेका छन्। यसले मलाई झनै ऊर्जा दिएको छ। अब यी भ्रष्टाचारीविरुद्ध अन्तिम लडाइँ लड्नेछु,” उनले भने।

प्रचण्डले हालै सम्पन्न उपनिर्वाचनको नतिजाले माओवादीको लोकप्रियता बढिरहेको प्रमाणित गरेको दाबी गरे। “एमाले–कांग्रेसले गठबन्धन गरी चुनाव लड्दा पनि माओवादी कोशी प्रदेशमा पहिलो भयो, देशभर दोस्रो स्थानमा उक्लियो। अब २०८४ को निर्वाचनमा हामी कांग्रेस र एमालेसँग कुनै गठबन्धन गर्ने छैनौं। जनताको काखमा बसेर बलियो बन्छौं,” उनले स्पष्ट पारे।

उनले माओवादीलाई कमजोर पार्ने षड्यन्त्र भइरहेको भन्दै पार्टी कार्यकर्तालाई सतर्क रहन आग्रह गरे। “माओवादीको उकालो यात्रा सुरु भइसकेको छ। हामीलाई पाखा लगाउने षड्यन्त्र परास्त गर्नुपर्छ,प्रचण्डले भने ।