खोज

काठमाडौं । संघीय संसदको प्रतिनिधि सभा आज महत्वपूर्ण कार्यसूचीसहित बस्दैछ। दिउँसो १ः०० बजेका लागि तय भएको बैठकमा महालेखा परीक्षकको वार्षिक प्रतिवेदन पेस गरिनुका साथै अर्थ, सुरक्षा, र कानुनी विधेयकहरू प्रस्तुत हुनेछन्। तर, सरकारको अध्यादेश रणनीति अन्योलग्रस्त देखिएको छ।
प्रधानमन्त्री केपी शर्मा ओलीले‘महालेखा परीक्षकको एकसट्ठियौं वार्षिक प्रतिवेदन, २०८१’ पेस गर्ने कार्यक्रम छ। त्यस्तै, उपप्रधान तथा अर्थमन्त्री विष्णुप्रसाद पौडेलले ‘आर्थिक कार्यविधि तथा वित्तीय उत्तरदायित्व (पहिलो संशोधन) विधेयक, २०८१’ फिर्ता लिन प्रस्ताव पेस गर्नेछन्।
नागरिकता विधेयकमा तनाब, प्रेम सुवालको विरोध निर्णायक चरणमा
प्रतिनिधि सभामा नागरिकता (दोस्रो संशोधन) विधेयक २०८१ प्रस्तुत गर्न अनुमति माग्ने प्रस्तावमाथि प्रेम सुवालको विरोध निर्णायक मोडमा पुगेको छ। गृह मन्त्री रमेश लेखकले नागरिकता विधेयक, नेपाल प्रहरी विधेयक, र सशस्त्र प्रहरी बलसम्बन्धी विधेयकहरू पेस गर्ने कार्यसूचीमा रहेका छन्।
बैंकिङ कसुर विधेयकमाथि छलफल, विधायन विधेयक पारित गर्ने तयारी
अर्थमन्त्री पौडेलले बैंकिङ कसुर तथा समाज (दोस्रो संशोधन) विधेयक २०८० छलफलका लागि पेस गर्दैछन्। साथै, कानून मन्त्री अजयकुमार चौरासियाले ‘विधान विधेयक, २०८१’ पारित गरियोस् भन्ने प्रस्ताव पेश गर्नेछन्।
सरकारको अध्यादेश रणनीति फेल? जसपाको खेल निर्णायक मोडमा
सरकारले आजको बैठकमा कुनै अध्यादेश प्रस्तुत गरेको छैन। अघिल्लो बैठकमा कार्यसूचीमा समेटिएको अध्यादेश अन्तिम समयमा फिर्ता लिइएको थियो। प्रतिनिधि सभामा दुई तिहाइ बहुमत भए पनि राष्ट्रिय सभाको अंकगणितले अध्यादेश पारित गर्ने सम्भावना कमजोर बनाएको छ।
जनता समाजवादी पार्टी (जसपा) नेपालले अध्यादेशबारे स्पष्ट निर्णय लिएको छैन। अध्यक्ष उपेन्द्र यादवले संघीय सरकारमा उपप्रधानमन्त्रीसहित मन्त्री पद र मधेश सरकारमा मुख्यमन्त्री नपाएसम्म समर्थन नजनाउने अडान लिएका छन्। सत्ता गठबन्धनभित्रको अन्योलले सरकारलाई थप दबाबमा पारेको छ। अध्यादेश अस्वीकृत भए सरकार गम्भीर राजनीतिक संकटमा पर्ने देखिन्छ, जसलाई टार्न कांग्रेस–एमालेका शीर्ष नेताहरू सक्रिय छलफलमा जुटेका छन्।