खोज

पोखरा । नेपाली कांग्रेसका सभापति एवं पूर्वप्रधानमन्त्री शेरबहादुर देउवाले सत्तारूढ गठबन्धनका साझेदार तथा नेकपा (एमाले) का अध्यक्षसमेत रहेका प्रधानमन्त्री केपी शर्मा ओलीप्रति अविश्वास गर्नु पर्ने कुनै अवस्था नरहेको बताएका छन्।

मंगलबार पोखरामा आयोजित नेपाली कांग्रेसका ७७ जिल्ला सभापतिहरूको प्रशिक्षण कार्यक्रममा बोल्दै देउवाले ओलीसँगको आफ्नो पुरानो सम्बन्ध स्मरण गर्दै राजनीतिक प्रतिस्पर्धा भए पनि विश्वासको संकट सिर्जना नहुने स्पष्ट पारे।

“ओलीजी र म जेल बस्दाका साथी हौं। धेरै कष्ट थियो, छुट्ने सम्भावना थिएन,” देउवाले भने, “झापा काण्ड देखाएर जेलभित्रकै जेलमा राखियो। हामी मुख्य प्रतिस्पर्धी हौं, तर पनि केपी ओलीबाट अविश्वास गर्नुपर्ने अवस्था छैन।”

उनले पार्टीभित्रको एकतामा जोड दिँदै कांग्रेसलाई सशक्त संगठनका रूपमा उभ्याउन जिल्ला सभापतिहरूलाई आग्रह गरे। “पार्टीभित्र आन्तरिक विवादका कारण कमजोर हुनुहुँदैन। एकताबद्ध भएर संगठन बलियो बनाउनुपर्छ,” उनले भने।

प्रशिक्षण कार्यक्रममा सहभागी नेताहरूले कांग्रेसको संगठन सुदृढीकरण, वर्तमान राजनीतिक परिप्रेक्ष्य र भावी रणनीतिका विषयमा छलफल गरेका छन्। पार्टी प्रशिक्षणको समापन बुधबार हुने जनाइएको छ।