© २०२३
कांग्रेसलाई एकताबद्ध बनाउँदै सुदृढीकरण: देउवा
पोखरा – नेपाली कांग्रेसका सभापति एवं पूर्वप्रधानमन्त्री शेरबहादुर देउवाले पार्टीलाई एकताबद्ध गर्दै सङ्गठन सुदृढ गर्नुपर्नेमा जोड दिएका छन्। नेपाली कांग्रेस केन्द्रीय नीति, अनुसन्धान तथा प्रशिक्षण प्रतिष्ठानद्वारा पोखरामा आयोजित अभिमुखीकरण कार्यक्रममा उनले पार्टीभित्र मनमुटाव नगरी एकढिक्का बन्न आग्रह गरे।
कार्यक्रम उद्घाटन गर्दै सभापति देउवाले पार्टीको सशक्त एकता बहुमत हासिल गर्नका लागि महत्त्वपूर्ण रहेको उल्लेख गर्दै राजनीतिक अस्थिरताको पृष्ठभूमिमा कांग्रेस र नेकपा (एमाले) बीच सहकार्य भएको स्पष्ट पारे। यद्यपि, एमाले प्रमुख प्रतिस्पर्धी भए पनि अविश्वास गर्नुपर्ने अवस्था नरहेको उनको भनाइ थियो।
“केपी ओली र मसँगै जेलमा बस्यौं, कठिन समय थियो, छुट्ने सम्भावना नै थिएन,” देउवाले भने, “झापा काण्ड देखाएर जेलभित्रकै जेलमा राखियो, हामी प्रतिस्पर्धी भए पनि परस्पर अविश्वास गर्नु पर्ने अवस्था छैन।”
उनले मुलुकको आर्थिक समृद्धि र विकासका लागि कांग्रेसले नेतृत्वदायी भूमिका निर्वाह गर्नुपर्ने औँल्याए।
कार्यक्रममा पार्टीका उपसभापति एवं नीति, अनुसन्धान तथा प्रशिक्षण प्रतिष्ठानका प्रमुख पूर्णबहादुर खड्काले तल्लो तहसम्म प्रभावकारी प्रशिक्षण आवश्यक रहेको बताए। कांग्रेस कार्यकर्तालाई निराशा त्यागी आशाका साथ अघि बढ्न आह्वान गर्दै उनले पार्टीलाई सशक्त रूपमा स्थापित गर्नुपर्ने उल्लेख गरे।
त्यस्तै, कांग्रेस कास्कीका सभापति किशोरदत्त बरालले कांग्रेसलाई उद्यमशीलतासँग जोड्दै बिपी चिन्तनको समयसापेक्ष प्रयोग आवश्यक रहेको धारणा राखे।
बुधबार समापन हुने प्रशिक्षण कार्यक्रममा पार्टीका केन्द्रीय नेताहरूले विभिन्न विषयमा प्रशिक्षण दिनेछन्। कार्यक्रममा जिल्ला सभापति, उपसभापति, प्रदेश सभापतिसहित करिब दुई सय नेता तथा कार्यकर्ता सहभागी छन्।
यो वेबसाइट पब्लिक सवाल प्रा. लि द्वारा संचालित न्युज पोर्टल हो। नेपाली भाषाको यो पोर्टलले समाचार, विचार, शिक्षा, स्वास्थ्य, मनोरञ्जन, खेल, विश्व, सूचना प्रविधि, भिडियो तथा जीवनका विभिन्न आयामका समाचार र विश्लेषणलाई समेट्छ ।
सूचना विभाग दर्ता नं.: ४४७०-८०/८१
फोन: +९७७-९८४०७४८००३
इमेल: [email protected]
ठेगाना: अनामनगर काठमाडौँ
© २०२३
सर्वाधिकार सुरक्षित
Developed By:
