खोज

काठमाडौं । उमेर हदको विवादलाई समेट्दै नेतृत्व चयन गरेको अखिल (क्रान्तिकारी) भित्र फेरि वरीयताको लडाइँ चर्किएको छ। प्रदेशका अध्यक्षहरू केन्द्रका पदाधिकारीभन्दा सिनियर हुँदा वरीयतामा तल परेको भन्दै उनीहरूले नीतिगत त्रुटि सच्याउन माग गरेका छन्।
कोशी, बागमती, गण्डकी, लुम्बिनी, कर्णाली र सुदूरपश्चिम प्रदेशका अध्यक्षहरूले आज संयुक्त विज्ञप्ति जारी गर्दै संगठनको विधान सच्याउन माग गरेका छन्। उनीहरूले नीतिगत त्रुटि नसच्याइए कुनै पनि कार्यक्रममा सहभागी नहुने चेतावनीसमेत दिएका छन्।

२३औँ राष्ट्रिय सम्मेलनअघि नै संगठनको विभिन्न तहका सम्मेलनहरू सम्पन्न भएका थिए। तर, त्यसबेला संगठनले उमेर हदबारे स्पष्ट निर्णय नगरेकाले प्रदेश अध्यक्षहरू निर्वाचित भएका थिए। पछि मतदानमार्फत ३२ वर्षे उमेर हद लागू भएपछि, केन्द्रमा जुनियर नेता निर्वाचित हुँदा प्रदेश अध्यक्षहरू वरीयतामा तल परेका छन्।

विज्ञप्तिमा प्रदेश अध्यक्षहरूलाई केन्द्रकै उपाध्यक्षसरह, प्रदेश उपाध्यक्ष तथा प्रमुख सचिवलाई उप-मासचिव सरह, र अन्य प्रदेश पदाधिकारीलाई सचिव सरहको मान्यता दिनुपर्ने माग राखिएको छ।
उनीहरूले माग पूरा नभए संगठनका कुनै पनि कार्यक्रममा सहभागी नहुने चेतावनी दिएका छन्। ‘हामी माथि अन्याय भएको छ। यदि छिटो निर्णय गरिएन भने पदाधिकारी बैठक, सपथ ग्रहण, स्ववियु कार्यशालालगायत कुनै पनि कार्यक्रममा सहभागी हुने छैनौं,’ विज्ञप्तिमा उल्लेख छ।

अब संगठनले प्रदेश अध्यक्षहरूको माग सम्बोधन गर्छ वा संस्थागत संरचनामा नयाँ रणनीति अपनाउँछ भन्ने विषय राजनीतिक चासोको विषय बनेको छ।