खोज

काठमाडौ । नेकपा (एमाले) का सचिव छविलाल विश्वकर्माले झापा क्षेत्र नं. ३ का नेता तथा कार्यकर्तालाई आगामी निर्वाचनमा आफैं जित्ने रणनीति तय गर्न निर्देशन दिएका छन्। यसअघि अन्य दलका उम्मेदवारलाई जिताउने नीति अवलम्बन गर्दै आएको एमाले अब भने स्वयम् चुनावी प्रतिस्पर्धामा उत्रने तयारीमा लागेको उनले स्पष्ट पारे।

बाह्रदशी गाउँ कमिटीद्वारा आयोजित कार्यकर्ता मिलन कार्यक्रममा उनले एमालेलाई अब निर्णायक शक्तिको रूपमा उभ्याउने बेला आएको उल्लेख गरे। ‘एमालेसँग कसैको तुलना हुन सक्दैन, यो राष्ट्रिय शक्ति हो,’ उनले भने, ‘अब एमालेलाई मुलुकको स्थायित्वको प्रमुख संवाहकका रूपमा स्थापित गर्नुपर्छ।’
०७४ र ०७९ सालको संघीय निर्वाचनमा झापा–३ मा एमालेले राप्रपाका अध्यक्ष राजेन्द्र लिङ्देनलाई समर्थन गर्दै आएको थियो। एमालेकै निर्णायक भोटले लिङ्देनले नेपाली कांग्रेसका प्रभावशाली नेता कृष्णप्रसाद सिटौलालाई पराजित गरेका थिए। तर, हाल लिङ्देनले आगामी निर्वाचनमा एक्लै उठ्ने घोषणा गरेपछि एमाले झापा–३ मा आफ्नै उम्मेदवार उतार्ने तयारीमा जुटेको छ।

सचिव विश्वकर्माले कार्यकर्ताहरूलाई आत्मनिर्भर हुन आग्रह गर्दै पार्टी सुदृढीकरणलाई तीव्र बनाउन निर्देशन दिए। उनले एमालेभित्र व्यापक सुधार र उदार राजनीतिक संस्कृतिको आवश्यकतामाथि पनि जोड दिँदै भने, ‘संगठनभित्र जिम्मेवारीप्रति इमानदारिता हुनुपर्छ, पार्टी बलियो भए मात्र चुनावी सफलता सम्भव छ।’

एमालेले अब झापा–३ मा कसलाई उम्मेदवार बनाउने भन्ने विषयमा आन्तरिक छलफल तीव्र बनाएको छ। सचिव विश्वकर्माको अभिव्यक्तिबाट झल्किन्छ कि आगामी निर्वाचनमा एमाले सशक्त प्रतिस्पर्धामा उत्रनेछ, जसले झापा–३ को राजनीतिक समीकरणमा ठोस प्रभाव पार्नेछ।