खोज

जनकपुर । मधेश प्रदेशका मुख्यमन्त्री सतिशकुमार सिँहले मिथिला नगरपालिका–१० लालगढस्थित माझी टोलमा नवजात शिशुहरूको अकाल मृत्युको घटनालाई रोक्न प्रदेश सरकारको तर्फबाट हरसम्भव प्रयास गर्ने प्रतिबद्धता जनाएका छन्।

शनिबार एक दैनिक पत्रिकाले माझी टोलका शिशुहरूमा देखिएको अकाल मृत्युबारे प्रकाशन गरेको समाचारप्रति गम्भीर ध्यान दिँदै मुख्यमन्त्रीले वस्तुस्थितिको अध्ययन गर्न आफ्ना प्रेस सल्लाहकार अनिलकुमार कर्ण र स्वकीय सचिव रविन सिँहलाई तुरुन्तै माझी बस्ती पठाएका थिए।

मुख्यमन्त्रीले पीडित कृष्णबहादुर माझीसँग टेलिफोन संवाद गर्दै, बच्चाहरूको मृत्युको कारण पहिचान गर्न र समस्या समाधानका लागि विशेषज्ञ चिकित्सकसहितको टोली पठाउने जानकारी दिएका छन्। कृष्णबहादुरको परिवारमा दुई श्रीमतीबाट जन्मिएका १५ सन्तानमध्ये १० जनाको ज्यान गुमेको दुःखद तथ्य बाहिर आएको छ।

मुख्यमन्त्रीले भने, “चिकित्सकीय अध्ययनका लागि विशेषज्ञ टोली तत्काल खटाइनेछ। प्रतिवेदनका आधारमा टोलमा आवश्यक उपचार, राहत, र प्रवद्र्धनात्मक कार्यक्रमहरू सञ्चालन गरिनेछ।”

मधेश स्वास्थ्यविज्ञान प्रतिष्ठानको संयोजनमा विशेषज्ञ टोली आइतबार माझी बस्ती पुग्दैछ। टोलीमा वरिष्ठ स्त्री तथा प्रसूति रोग विशेषज्ञ डा. रुबी सिँह, प्रतिष्ठानका उपकुलपति डा. अंकुर साह, र अन्य अधिकारीहरू सहभागी हुनेछन् ।

प्रदेश सरकारको पहलमा वंशानुगत समस्या, जीवनशैली, र उपचार अभावजस्ता कारणहरूको यकिन गरी नियन्त्रणात्मक, उपचारात्मक, र प्रबद्र्धनात्मक कार्य अघि बढाइने जानकारी दिइएको छ। मुख्यमन्त्रीको यो सक्रियता माझी बस्तीमा नवजात शिशुहरूको जीवनरक्षा गर्न प्रदेश सरकारको दृढ संकल्पको प्रतिबिम्ब हो।