खोज

काठमाडौं । सार्वजनिक लेखा समितिका सभापति ऋषिकेश पोखरेलले आफ्ना स्वकीय सचिव अनिलकुमार पोखरेललाई ३८ लाख ८० हजार रुपैयाँ असुली गर्ने आरोपमा पदबाट बर्खास्त गरेका छन्। पोखरेलले एमबिबिएस डाक्टर पढाउने आश्वासन दिई उक्त रकम असुली गरेको आरोप छ। पोखरेलको भ्रष्टाचार र ठगीको मामिलामा गम्भीर अनुसन्धान सुरु भएको छ।

अनिलकुमार पोखरेलले बौआलाल चौधरीकी छोरीलाई एमबिबिएस डाक्टर बनाउन मद्दत गर्ने आश्वासन दिएका थिए। पोखरेलले आफ्नो पहुँच र प्रभावको बारेमा कुरा गर्दै चौधरीलाई विश्वासमा लिएर रकम असुली गरेका थिए। चौधरीले पोखरेललाई बारम्बार रकम तिरे पनि, उनले कुनै प्रकारको मद्दत गरेनन् र रकम फिर्ता पनि गरेनन्। चौधरीले थाहा पाएपछि रकम फिर्ता गर्न खोजे, तर पोखरेलले बहाना बनाएर रकम फिर्ता गरेनन्।

कानुनी कदम चाल्न थालेपछि उनले इलाका प्रहरी कार्यालय रंगेली र जिल्ला प्रहरी कार्यालय मोरङमा जाहेरी दिएको तर दुवै ठाउँमा उक्त जाहेरी अस्वीकार भएको थियो। त्यसपछि उनले उच्च अदालत विराटनगरमा रिट दायर गरे र अदालतले परमादेश जारी गर्दै छानबिन प्रक्रिया अघि बढाउन आदेश दिएको थियो। उच्च अदालतले पोखरेल, इलाका प्रहरी कार्यालय रंगेली, जिल्ला प्रहरी कार्यालय मोरङ र जिल्ला सरकारी वकिलको कार्यालयलाई जिम्मेवार बनाउँदै कानुनी कर्तव्य पुरा गर्न आदेश दिएको थियो।

पोखरेलले नेकपा (एमाले) मोरङ जिल्ला कमिटी सदस्यको रूपमा पनि काम गर्दै आएका छन् र २०७९ मंसिरमा भएको प्रदेश सभा चुनावमा उम्मेदवारका आकांक्षी थिए।