खोज

काठमाडौ । प्रतिनिधि सभाअन्तर्गत राज्य व्यवस्था तथा सुशासन समितिका सभापति रामहरि खतिवडाले सहकारी ठगी प्रकरणमा संलग्न जो–कोहीलाई कानुनी कारबाहीको दायरामा ल्याइने बताएका छन्। पब्लिक सवालसँगको विशेष कुराकानीमा उनले वर्तमान सरकार गल्ती गर्ने कसैलाई जोगाउन नलाग्ने स्पष्ट पारे।

उनले भने, “गलत गर्ने कोही पनि कानुनको कठघरामा आउनबाट जोगिन सक्दैन। कांग्रेसका नेता होस् या एमालेका, कानुन सबैका लागि बराबर हुन्छ। धनराज गुरुङ वा ऋषिकेश पोखरेल, जो–कोहीले गल्ती गरे कानुनी कारबाही हुनुपर्छ।”

सभापति खतिवडाले श्रीमतीको गल्तीमा श्रीमानलाई जिम्मेवार बनाउनु अन्याय हुने बताउँदै भने, “यदि श्रीमतीले गल्ती गरेको भए पनि श्रीमानको संलग्नता नभएको अवस्थामा उनलाई सजाय दिन मिल्दैन।”

खतिवडाले पार्टी उपसभापति धनराज गुरुङको डिभोर्सको विषयमा समेत प्रस्टिकरण दिएका छन्। उनले भने, “२०७९ सालमा मन्त्री हुँदा गुरुङले श्रीमतीको नाम सरकारी कागजातमा राखेको पाइएको छ। तर, यो विषय अदालतले हेर्ने हो।” उनले स्पष्ट गरे, “गलत गर्ने व्यक्ति कोही भए पनि कानुनी कारबाहीबाट बच्न सक्दैन।”

खतिवडाले वर्तमान सरकारको स्थिरतामा विश्वास व्यक्त गर्दै २०८४ सम्म कांग्रेस–एमाले गठबन्धन कायम रहने दाबी गरे। “शेरबहादुर देउवा र केपी ओलीबीचको सहमतिले सरकार बलियो छ। बाहिरी दबाबले सरकार ढल्ने छैन,” उनले भने।

खतिवडाले जनताका चाहनाहरू पूरा गर्न सरकार प्रतिबद्ध रहनुपर्ने बताए। “यदि जनताको अपेक्षा पूरा गरिएन भने अस्थिरता निम्तिन सक्छ,” उनले चेतावनी दिए।

भ्रष्टाचार निवारण ऐन २०५९ संशोधनमा चर्चा गर्दै खतिवडाले व्यक्तिको फोन ट्रयापिङ अदालतको अनुमतिबिना गर्न नमिल्ने बताए। “कुनै पनि व्यक्तिको गोपनीयताको सम्मान गर्नु अत्यन्त आवश्यक छ। अदालतको अनुमति बिना यस्तो कदम कानुनविपरीत हुनेछ,” उनले भने।

सुशासन र समृद्धिका लागि सरकारको प्रतिबद्धता
खतिवडाले सहकारी ठगी प्रकरणजस्ता घटनामा कठोर कारबाहीमार्फत जनविश्वास कायम राख्ने प्रतिबद्धता व्यक्त गरे। “सरकारको प्राथमिकता सुशासन र समृद्धि हो। कुनै पनि कमजोरी सह्य हुने छैन,” उनले थपे।