खोज

काठमाडौँ । संस्कृति, पर्यटन तथा नागरिक उड्डयनमन्त्री बद्रीप्रसाद पाण्डेले पर्यटन क्षेत्रको समृद्धिका लागि निजी क्षेत्रको सक्रियता अपरिहार्य रहेको बताएका छन्। प्रतिनिधि सभाको अन्तर्राष्ट्रिय सम्बन्ध र पर्यटन समितिको आजको बैठकमा मन्त्री पाण्डेले तीन तहका सरकारहरूबीच सहकार्य गर्दै पर्यटन क्षेत्रको विकासलाई प्राथमिकता दिनुपर्नेमा जोड दिए। उनले पर्यटन क्षेत्रमा देखिएका चुनौतीहरू समाधान गर्न मन्त्रालयले सरोकारवालासँग दुई वटा बैठक सम्पन्न गरिसकेको जानकारी दिए। मन्त्री पाण्डेले भने, “पर्यटन क्षेत्रका समस्या समाधान गर्न वृहत् छलफल र सहकार्यको खाँचो छ। समितिको साथ र सहयोगले मात्र यी चुनौतीहरू पार गर्न सकिनेछ।” पोखरा र भैरहवा विमानस्थलको नियमित सञ्चालनबारे मन्त्रीले समीक्षा प्रक्रिया अघि बढिरहेको र केही व्यवस्थापकीय कदमहरूपछि यी विमानस्थल पूर्णरूपमा सञ्चालन हुने विश्वास व्यक्त गरे। नीति तथा विधेयकमा प्रगति मन्त्री पाण्डेले पर्यटन संस्कृति नीतिको अन्तिम चरण पूरा भएको र नागरिक उड्डयनसम्बन्धी विधेयक मन्त्रिपरिषद्ले पारित गरिसकेको जानकारी गराए। मन्त्रालयका सचिव डा. गणेशप्रसाद पाण्डेयले मन्त्रालयको गतिविधिबारे जानकारी गराउँदै पुँजी, प्रविधि, र जनशक्तिको अभावले अपेक्षित प्रगति गर्न नसकिएको उल्लेख गरे। निजी क्षेत्रको सक्रियतासहित सरकारको सहकार्यले मात्र पर्यटन क्षेत्रको दीर्घकालीन विकास सम्भव हुनेमा सरोकारवालाहरूले सहमति व्यक्त गरेका छन्।