खोज

देवघर, झारखण्ड – देवघरमा सम्पन्न भव्य अन्तर्राष्ट्रिय मिथिला सम्मेलनले मिथिला संस्कृतिको संरक्षण र प्रवर्द्धनको लक्ष्यलाई थप बलियो बनाएको छ। यसै अवसरमा नेपालको प्रतिनिधित्व गर्दै सामाजिक सेवामा अतुलनीय योगदान पुर्‍याएका राजीव झालाई प्रतिष्ठित ‘मिथिला रत्न’ सम्मान प्रदान गरिएको छ।

राजीव झा, जो क्लोथ बैंक नेपाल र खुला सिमा संवाद समूहका अध्यक्ष हुन्, सामाजिक सेवाका क्षेत्रमा गरीबी निवारणदेखि कोभिड महामारीको बेला निशुल्क औषधि, अक्सिजन सिलिन्डर, र डाक्टरहरूको सेवा उपलब्ध गराउँदै सीमावर्ती क्षेत्रका समस्याहरू समाधान गर्नेतर्फ सक्रिय रूपमा योगदान पुर्‍याउँदै आएका छन्।

सम्मान प्रदान समारोहमा बिद्यापति सेवा संस्थानका अध्यक्ष डा. बैद्यनाथ चौधरी बैजु बाबुले राजीव झाको समर्पण र अथक प्रयासको प्रशंसा गर्दै उनको सेवाले स्थानीय क्षेत्रमा महत्वपूर्ण परिवर्तन ल्याएको धारणा राखे। झारखण्डका विभिन्न विशिष्ट व्यक्तित्वहरूको उपस्थिति रहेको उक्त कार्यक्रममा मिथिलाञ्चलको संस्कृति र मानवताका लागि झाको योगदानलाई उच्च सम्मान गरिएको थियो।

सम्मान ग्रहण गर्दै राजीव झाले यो उपलब्धि आफूले समाजसेवाका क्रममा पाएको सहयोग र साथको प्रतिफल भएको बताए। उनले आफ्नो परिवार, शुभचिन्तक, र संस्थाका पदाधिकारीहरूप्रति आभार प्रकट गर्दै आगामी दिनमा अझ प्रभावकारी समाजसेवाको प्रतिबद्धता व्यक्त गरे।

यस कार्यक्रममा धर्म, साहित्य, र प्रशासनिक क्षेत्रमा उल्लेखनीय योगदान गरेका व्यक्तिहरूको उपस्थिति रह्यो, जसले मिथिलाकाे पहिचान र महत्त्वलाई थप उजागर गर्‍यो।