खोज

काठमाडौ । गृहमन्त्री रमेश लेखकले माओवादी केन्द्रका अध्यक्ष तथा पूर्वप्रधानमन्त्री पुष्पकमल दाहाल ‘प्रचण्ड’ले सहकारी ठगी प्रकरणमा पक्राउ परेका राष्ट्रिय स्वतन्त्र पार्टीका सभापति रवि लामिछानेबारे दिएको टिप्पणीलाई तथ्यहीन भनेका छन्।

नेपाल प्रेस युनियनद्वारा चितवनको भरतपुरमा आयोजित पत्रकार सम्मेलनमा गृहमन्त्री लेखकले प्रचण्डको अभिव्यक्तिले न्यायिक प्रक्रियामा अवरोध पुर्‍याउने खतरा रहेको बताए। “सरकारले कसैमाथि प्रतिशोधपूर्ण व्यवहार गरेको छैन। कानुनको दायराभित्र रहेरै सबै अनुसन्धान गरिएको छ, र समयमै अदालतमा पेस गरिएको छ,” गृहमन्त्री लेखकले भने।

उनले प्रचण्डले सामाजिक सञ्जालमा सार्वजनिक गरेको टिप्पणी कानुन र न्यायिक प्रक्रियामाथि प्रश्न उठाउने प्रयास भएको दाबी गरे। “प्रचण्डको अभिव्यक्ति दुर्भाग्यपूर्ण मात्र होइन, न्यायिक प्रक्रियामा अवरोध सिर्जना गर्न खोजिएको संकेत हो,” लेखकले थपे।

गृहमन्त्री लेखकले सरकार कानुनी मापदण्डमा प्रतिबद्ध रहेको र लामिछानेको प्रकरणमा कुनै पनि प्रकारको पूर्वाग्रह नभएको स्पष्ट पारे। “सरकारले प्रतिशोध होइन, न्यायिक प्रक्रिया अनुसार काम गरेको छ। कसैलाई पनि कानुनभन्दा बाहिर गएर थुनामा राखिएको छैन,” उनले दाबी गरे।

पूर्वप्रधानमन्त्री प्रचण्डले केही दिन अघि सामाजिक सञ्जाल फेसबुकमा लामिछानेमाथि सरकार प्रतिशोधपूर्ण रूपमा प्रस्तुत भएको आरोप लगाएका थिए। उक्त अभिव्यक्तिलाई लेखकले निराधार र तथ्यहीन भनेका छन्।

गृहमन्त्री लेखकले न्यायिक स्वतन्त्रता र कानुनी प्रक्रियाप्रति सरकार प्रतिबद्ध रहेको पुनः दोहोऱ्याउँदै अदालतले तोकेको समयसीमाभित्रै अनुसन्धान प्रक्रिया टुंग्याइएको स्पष्ट गरे। उनले यस्तो अभिव्यक्ति राजनीतिमा सनसनी पैदा गर्न खोजिएको आरोप लगाए।

यस प्रकरणले राजनीतिक र न्यायिक तहमा नयाँ बहसको सुरुवात गरेको छ। रवि लामिछानेको सहकारी ठगी प्रकरणमा न्यायिक प्रक्रियालाई असर पार्न खोजिएको भन्दै सरकारी तवरबाट थप निगरानी आवश्यक रहेको विश्लेषकहरूले बताएका छन्।