खोज

काठमाडौं। वन तथा वातावरणमन्त्री ऐनबहादुर शाही ठकुरीले मानव र वन्यजन्तुबीचको द्वन्द्व न्यूनीकरण गर्दै वन्यजन्तु संरक्षण र पर्यटन विकासका लागि सरकार प्रतिबद्ध रहेको बताएका छन्। पर्सा राष्ट्रिय निकुञ्जको अनुगमन तथा अन्तरक्रिया कार्यक्रममा बोल्दै उनले वन्यजन्तु र मानव बीचको द्वन्द्वले सिर्जना गरेका समस्या समाधान गर्न दीर्घकालीन योजना आवश्यक रहेको बताए।

मन्त्री शाहीले बाघ, जङ्गली हात्ती लगायतका ठूला वन्यजन्तु गाउँबस्तीमा प्रवेश गर्न नदिन र मानिसलाई जङ्गलभित्र जान रोक्न सके द्वन्द्व न्यूनीकरण गर्न सकिने धारणा राखेका छन। उनले भने, “वन्यजन्तुले जनजीवनमा पुर्‍याउने क्षतिलाई न्यून गर्न पीडितलाई तत्काल राहतको व्यवस्था गर्नु अत्यावश्यक छ।

पर्सा र चितवन राष्ट्रिय निकुञ्जलाई जोडेर पर्यटन विकास गर्न एकीकृत टिकट प्रणाली लागू गर्ने योजना अघि सार्दै मन्त्री शाहीले भने, “निकुञ्ज पर्यटन क्षेत्रको प्रमुख गन्तव्य भएकाले यसलाई व्यवस्थित बनाउँदै जल, जङ्गल, र वन्यजन्तुको संरक्षणमा ध्यान दिनुपर्छ।” उनले चितवन भ्रमणमा आउने पर्यटकले पर्सा पनि घुम्न सक्ने र पर्साबाट आएका पर्यटकले चितवन भ्रमण गर्न सक्ने वातावरण तयार गरिने बताए।

वन क्षेत्रमा सडेगलेका काठको उपयोग गर्न र आयातित काठलाई प्रतिस्थापन गर्न गृहकार्य भइरहेको जनाउँदै मन्त्री शाहीले वन ऐन संशोधनका लागि मन्त्रालय गम्भीर रहेको बताए। उनले वन क्षेत्रको संरक्षणलाई समस्या होइन, समृद्धिसँग जोड्नुपर्ने धारणा राख्दै भने, “मन्त्रालयले विकासमा बाधा पुर्‍याउँछ भन्ने भ्रमको अन्त्य गर्न हामी काम गरिरहेका छौँ।”

पर्सा राष्ट्रिय निकुञ्जका समस्या समाधान गर्न आफू गम्भीर रहेको बताउँदै मन्त्री शाहीले निकुञ्जका कर्मचारीलाई उत्कृष्ट काम गर्न थप प्रेरित गराए। “निकुञ्ज संरक्षण र व्यवस्थापनमा सबैको योगदान अपरिहार्य छ,” उनले भने।

वन्यजन्तु संरक्षण र पर्यटन विकासका यी प्रयासहरूले मानव र वन्यजन्तुबीचको द्वन्द्व घटाउँदै नेपालको समृद्धि र पर्यावरणीय सन्तुलन कायम गर्न महत्वपूर्ण भूमिका खेल्ने अपेक्षा गरिएको छ।