खोज

चितवन। राष्ट्रिय स्वतन्त्र पार्टी (रास्वपा) का सभापति रवि लामिछानेमाथि दुर्व्यवहार गरिएको भन्ने आरोप चितवन प्रहरीले खारेज गरेको छ। चितवन प्रहरीले बिहीबार विज्ञप्ति जारी गर्दै रास्वपाका दाबीलाई झुटा, भ्रामक, र तथ्यहीन बताएको छ।

चितवन प्रहरीका अनुसार, बुधबार राति बयान सकिएपछि लामिछानेलाई हिरासत कक्षमा नलगी भेटघाट कक्षमा आफन्त र शुभचिन्तकसँग भेट्न दिइएको थियो। भेटघाटपछि राति १२:०५ बजे उनलाई पोखराका लागि लैजानु परेको प्रहरीको भनाइ छ।

विज्ञप्तिमा भनिएको छ, “बयानका क्रममा भीडले अनुसन्धान कार्यमा अवरोध पुर्‍याउन खोज्यो। प्रहरीमाथि ढुंगामुढा प्रहार गर्नुका साथै जिल्ला प्रहरी कार्यालय र सरकारी वकिलको कार्यालयमा भीड प्रवेश गर्न खोजेको थियो। मौसम प्रतिकूल रहेकाले हवाई मार्ग प्रयोग गर्न नसकिने अवस्था थियो। भीडले लामिछानेको सुरक्षामा प्रतिकूल असर पुर्‍याउन सक्ने देखिएकाले राति नै पोखरामा लैजानु परेको हो।”

प्रहरीले लामिछानेलाई राति सुतिरहेको बेला हिरासत कक्षबाट जबर्जस्ती उठाइएको, दुर्व्यवहार गरिएको, र अस्वस्थ अवस्थामै लैजान खोजिएको भन्ने आरोपलाई पूर्णतः खारेज गरेको छ। साथै, प्रहरी कर्मचारीले जाँडरक्सी सेवन गरेको आरोपलाई पनि झुटो र भ्रामक बताएको छ।

रास्वपाले लामिछानेमाथि मानव अधिकार हनन गरिएको भन्दै राष्ट्रिय मानव अधिकार आयोगमा उजुरी दिएको छ। उजुरीमा उनलाई राति जबर्जस्ती लैजानु गैरकानूनी भएको उल्लेख छ।

प्रहरीले आफ्नो कदमलाई नियमसम्मत र परिस्थितिजन्य आवश्यकताअनुसारको भने पनि रास्वपाले मानव अधिकार उल्लंघनको विषय उठाएपछि यो घटना थप चर्चामा आएको छ।