खोज

काठमाडौँ । नेकपा एमालेका महासचिव शंकर पोख्रेलले संविधान संशोधन प्रक्रिया डेढ वर्षपछि, अर्थात् आगामी राष्ट्रिय सभा सदस्यको निर्वाचनपछि मात्र अघि बढ्ने बताएका छन्। उनले दाङको लमहीमा आइतबार आयोजित पार्टी कार्यकर्ता भेलामा यो कुरा सार्वजनिक गरे।

महासचिव पोख्रेलले भने, “संविधान र कानुनमा सुधार गर्नको लागि राजनीतिक स्थायित्वको आधार तयार गर्न, दुई ठूला दलको बीचमा समीकरण बनेको हो, तर राष्ट्रिय सभामा हाम्रो पक्षको दुई तिहाइ बहुमत छैन।” उनले थपे, “राष्ट्रिय सभामा दुई तिहाइ नपुग्दासम्म संविधान संशोधनको एजेन्डा अघि बढ्न सक्दैन।”

पोख्रेलका अनुसार, माओवादीसँग संविधान संशोधनको बारेमा सहमति नजुटेको कारण यो प्रक्रिया अझै अघि बढ्न सकेको छैन। उनले भने, “डेढ वर्ष पछि राष्ट्रिय सभाको निर्वाचनपछि त्यसको संरचना बदलिने छ र त्यसपछि संविधान संशोधनको प्रक्रिया अघि बढ्नेछ।”

यसै बीच, महासचिव पोख्रेलले एमालेलाई आगामी ८४ को निर्वाचनमा बलियो राजनीतिक शक्ति निर्माण गर्ने दिशामा कार्य गर्न निर्देशन दिए। उनले स्पष्ट पारे, “हामी ठुला दुई दलले मिलेर चुनाव लड्ने होइन, एकल प्रतिस्पर्धामा रहनुपर्नेछ।”

पोख्रेलले हालै सम्पन्न उपनिर्वाचनमा रुकुम पूर्वमा भएका तालमेललाई सही नभएको बताउँदै, आगामी चुनावमा एकल संघर्षमा जाने कुरामा जोड दिए।