खोज

डडेल्धुरा – नेपाली कांग्रेसका नेता नैनसिंह महरले सरकारलाई जनताको निराशालाई आशामा बदल्न जनअपेक्षा अनुसार काम गर्न चेतावनी दिएका छन्। नेपाली कांग्रेस जिल्ला कार्य समिति डडेल्धुराले आयोजना गरेको कार्यक्रममा प्रमुख अतिथिको रूपमा सम्बोधन गर्दै महरले सरकारको प्रारम्भिक सय दिनको हनिमुन अवधिको समीक्षा गर्दा खासै उपलब्धि हासिल नभएकोले कांग्रेसले मुखदर्शक भएर बस्न नसक्ने बताए।

“सरकारको सफलतासँगै असफलता पनि कांग्रेसको प्रतिष्ठासँग जोडिएको छ,” महरले भने, “देशव्यापी अभियानमार्फत जनता सरकारको कामको समीक्षा गर्नेछन्। यदि त्यसपछि पनि सरकार जनअपेक्षा अनुसार चल्न असफल रह्यो भने कांग्रेसले नयाँ कदम चाल्नुपर्ने अवस्था आउन सक्छ।”

महरले सरकारका क्रियाकलापहरूमा कांग्रेसको दृष्टिकोण स्पष्ट पार्दै भने कि अब कांग्रेसले सशक्त रूपमा जनताको भावना अभिव्यक्त गर्नेछ।

उनले संविधानमा उल्लेखित निशुल्क स्वास्थ्य र शिक्षा प्राप्त गर्ने जनताको हकको कार्यान्वयन गराउन देशभरका १६५ वटै निर्वाचन क्षेत्रमा मंसिरको पहिलो हप्ताबाट विमर्शात्मक अभियान सञ्चालन गर्ने घोषणा पनि गरे। उनले यो अभियानले जनताको आधारभूत हक सुनिश्चित गर्न महत्वपूर्ण भूमिका खेल्ने विश्वास व्यक्त गरे।