खोज

कार्तिक, १ काठमाडौँ। प्रधानमन्त्री एवं नेकपा (एमाले) का अध्यक्ष केपी शर्मा ओलीसहित तीन दलका शीर्ष नेताहरूको महत्त्वपूर्ण बैठक आज प्रधानमन्त्री निवास बालुवाटारमा सुरु भएको छ।

बैठकमा नेपाली कांग्रेसका सभापति एवं पूर्व प्रधानमन्त्री शेरबहादुर देउवा, प्रमुख प्रतिपक्षी दल नेकपा (माओवादी केन्द्र) का अध्यक्ष एवं पूर्व प्रधानमन्त्री पुष्पकमल दाहाल ‘प्रचण्ड’, गृहमन्त्री रमेश लेखक, माओवादी केन्द्रका उपमहासचिव शक्तिबहादुर बस्नेत, र महान्यायाधिवक्ता रमेश वडाल सहभागी छन्।

प्रधानमन्त्री ओलीको नेतृत्वमा सुरु भएको यो छलफल शान्ति प्रक्रियालाई अन्तिम रूप दिने उद्देश्यसहितको प्रयासका रूपमा हेरिएको छ। बैठकमा सत्य निरूपण तथा मेलमिलाप आयोग र बेपत्ता पारिएका व्यक्तिहरूको छानबिन आयोग गठनका विषयमा विस्तृत रूपमा छलफल भइरहेको जानकारी प्राप्त भएको छ।

गत भदौ १३ गते राष्ट्रपतिबाट ती आयोगसम्बन्धी कानुन संशोधन गर्ने विधेयक प्रमाणीकरण भएको थियो, जसले शान्ति प्रक्रियाका बाँकी चरणहरूलाई टुंग्याउन मार्ग प्रशस्त गर्ने विश्वास लिइएको छ। सहभागी नेताहरूका अनुसार, यी संवेदनशील विषयमा छिट्टै समाधान निकाल्न सघन प्रयास भइरहेका छन्।