खोज

नेकपा माओवादी केन्द्रका अध्यक्ष तथा पूर्वप्रधानमन्त्री पुष्पकमल दाहाल ‘प्रचण्ड’ ले नेपाल नयाँ शीतयुद्धको ‘इपिसेन्टर’ बन्न सक्ने खतरा औंल्याएका छन्। बुधबार विभिन्न सञ्चारमाध्यमका सम्पादकहरूसँगको छलफलका क्रममा प्रचण्डले दक्षिण एसियामा हालका राजनीतिक घटनाक्रमले अस्थिरताको संकेत देखाएको बताए।

उनले पछिल्लो समयमा दक्षिण एसियाका मुलुकहरूमा देखा परेका राजनीतिक अस्थिरताहरूलाई उल्लेख गर्दै श्रीलंका र बंगलादेशको उदाहरण दिए। प्रचण्डले यी मुलुकहरूमा सरकारहरू निर्माण र पतनको क्रमले ठूलो अस्थिरता निम्त्याएको र नेपालले पनि यसप्रति सचेत रहनुपर्ने आवश्यकता औंल्याए।

साथै, प्रचण्डले पूर्व राजा ज्ञानेन्द्र शाहको हालैको भुटान भ्रमणको सन्दर्भमा पनि आफ्नो धारणा राख्दै नेपालमा राजतन्त्र पुनःस्थापनाको कुनै सम्भावना नरहेको स्पष्ट पारे। उनले भने, “मलाई कतैबाट पनि राजतन्त्र फर्कने सम्भावना छैन। ज्ञानेन्द्र भुटान गए भन्दैमा राजतन्त्र फर्किँदैन।”

इतिहासको विकासक्रम र पूर्वराजाको पारिवारिक स्थितिलाई आधार बनाएर प्रचण्डले राजतन्त्र फर्कन नसक्ने निष्कर्ष प्रस्तुत गरे। “हामी गणतन्त्रमा गइसकेपछि जनतालाई सजिलै फेरि राजतन्त्रतिर फर्काउन सम्भव छैन,” उनले भने, “राजा र उनको परिवारको कारणले पनि राजतन्त्र फर्किने अवस्था छैन।”

प्रचण्डको यो भनाइ दक्षिण एसियाको बढ्दो राजनीतिक अस्थिरता र नेपालको वर्तमान परिस्थितिप्रति सजगता अपनाउनुपर्ने सन्देशका रूपमा आएको छ।