खोज

८ असोज, काठमाडौं। उपसभापति डा स्वर्णिम वाग्लेको नेतृत्वमा शनिबार चीन भ्रमणमा गएको राष्ट्रिय स्वतन्त्र पार्टी (रास्वपा)को टोली अब बुधबार नेपाल फर्किने भएको छ। सोमबार नै फर्किने योजना भए पनि टिकट नपाइएपछि टोली भोलि मात्र स्वदेश फर्किने सह प्रवक्ता प्रतिभा रावलले जानकारी दिइन्।

चिनियाँ कम्युनिस्ट पार्टीको निम्तोमा १४ जनाको टोली, जसमा ७ जना सांसद र ७ जना गैरसांसद छन्, शनिबार राति चीन गएको थियो। तर, पार्टी सभापति रवि लामिछानेसँग जोडिएको सहकारी ठगी प्रकरणले अचानक नयाँ राजनीतिक घटनाक्रम ल्याएकोले टोली सोमबार फर्किने तयारीमा थियो।

उपसभापति वाग्लेसहित, अन्तर्राष्ट्रिय सम्बन्ध विभाग प्रमुख शिशिर खनाल, कोषाध्यक्ष लिमा अधिकारी, कार्यवाहक प्रवक्ता मनिष झा, र अन्य नेताहरु चीन भ्रमणमा थिए।

सहकारीको बचत रकमको अपचलन सम्बन्धी संसदीय छानबिन समितिले गोर्खा मिडिया प्रालिको माध्यमबाट रास्वपा सभापति रवि लामिछाने, जीबी राई, कुमार रम्तेल र छविलाल जोशीविरुद्ध कारबाही गर्न सिफारिस गरेको छ।

गृह मन्त्री रमेश लेखकले प्रहरी महानिरीक्षक वसन्त कुँवरलाई कारबाही अघि बढाउन आग्रह गरेकै दिन आइतबार छविलाल पक्राउ परेका थिए। उनलाई जिल्ला अदालत कास्कीले ५ दिन थुनामा राखेर अनुसन्धान गर्न अनुमति दिएको छ।