खोज

८ असोज, काठमाडौं। लेबनानमा इजरायलको आक्रमणबाट एकैदिन ४९२ जनाको मृत्यु भएको छ, जसमा ३५ बालबालिका र ५८ महिलाहरु रहेका छन्। लेबनानको स्वास्थ्य मन्त्रालयले आक्रमणमा १ हजार ६४५ जना घाइते भएको पुष्टि गरेको छ, तीमध्ये केहीको अवस्था गम्भीर भएकाले मृतकको संख्या अझै बढ्नसक्ने अनुमान गरिएको छ।

इजरायली सेनाले हिजबुल्लाहका १ हजार ३०० भन्दा बढी स्थानमा आक्रमण गरेको बताएको छ। यो आक्रमण हालसम्मकै सबैभन्दा भयानक भएको विभिन्न अन्तर्राष्ट्रिय सञ्चार माध्यमहरुले जनाएका छन्। हमासविरुद्धको संघर्षमा हिजबुल्लाहले सहयोगको घोषणा गरेपछि इजरायलले हिजबुल्लाहलाई आफ्नो निशानामा राखेको हो।

लेबनानका स्वास्थ्य मन्त्री फिरास अबियादले इजरायलको आक्रमणले सर्वसाधारणको घर, स्वास्थ्य केन्द्रहरु, एम्बुलेन्स, र निजी सवारी साधनमा समेत क्षति पुर्याएको बताएका छन्। हिजबुल्लाहले इजरायली भूमिमा दुई सयभन्दा बढी रकेट प्रहार गरेको थियो, जसमा इजरायली पक्षका दुई जना घाइते भएका छन्।

यस आक्रमणपछि दुवै पक्षलाई संयमित रहन विश्वभरका केही देशहरुले आह्वान गरेका छन्। इरानले इजरायलको कारवाहीलाई कडा शब्दमा निन्दा गरेको छ, जबकि यो आक्रमण ठूलो युद्धमा परिणत हुने डर बढ्दै गएको छ।