खोज

७ असोज, काठमाडौं । सूर्यदर्शन सहकारीका पीडित बचतकर्ताहरूले रवि लामिछानेलाई पक्राउ गर्न माग गर्दै कास्की जिल्ला प्रशासन कार्यालयको बाहिर नाराबाजी गरेका छन्। उनीहरूले लामिछानेले गोरखा मिडिया मार्फत सहकारीको पैसा दुरुपयोग गरेको आरोप लगाउँदै प्रदर्शन गरेका हुन्।

जिल्ला प्रशासन कार्यालयको गेट बाहिर सहकारी पीडितहरूको प्रदर्शन भइरहेको छ भने, शहीद चोक नजिकै रवि लामिछाने समर्थक नेता–कार्यकर्ताहरूले पनि लामिछानेको समर्थनमा नाराबाजी गरिरहेका छन्। पीडितहरूले लामिछानेलाई पक्राउ गर्न माग गरिरहेका छन्, जबकि रास्वपा समर्थकहरूले उनको गिरफ्तारी नगर्न चेतावनी दिएका छन्।

सुरक्षा व्यवस्थामा कडाइ गरिएको छ, किनकि पीडित र लामिछाने समर्थकहरू आमनेसामने भएका छन्। प्रशासन र शहीद चोक वरपर सुरक्षा अधिकारीहरू खटाइएको छ।

सहकारी अपचलनबारे संसदीय विशेष समितिको सिफारिस अनुसार पूर्वडीआईजी छविलाल जोशीलाई आइतबार गोरखा मिडिया प्रालिका सञ्चालकको रूपमा पक्राउ गरिएको थियो। उनलाई आज अदालतमा पेश गर्नका लागि कास्की ल्याइएको छ, जसका कारण सहकारी पीडितहरूले प्रदर्शन गर्दै रवि लामिछानेलाई पनि पक्राउ गर्न माग गरेका छन्।

सहकारी पीडितहरूले गोरखा मिडियामा सहकारीको पैसा अपचलन गरिएको आरोप लगाउँदै २२ माघ २०८० मा रवि सहित १८ व्यक्तिविरुद्ध मुद्दा दायर गरेका थिए।