खोज

५ असोज, म्याग्दी। संसारको सबैभन्दा उचाइमा रहेको तिलिचो तालसम्मको नयाँ पदमार्ग मुस्ताङबाट सञ्चालनमा आएको छ। मुस्ताङको सदरमुकाम जोमसोम हुँदै ठिनी गाउँबाट तिलिचो तालसम्मको यात्रा अब आन्तरिक पर्यटकहरूले सजिलै गर्न थालेका छन्।

यसअघि मनाङको चामे हुँदै खाङसारबाट तिलिचो ताल पुग्न प्रयोग हुने पुरानो पदमार्गलाई विस्थापित गर्दै नयाँ पदमार्ग प्रयोगमा आएको हो। मुस्ताङको घरपझोङ गाउँपालिकाका अध्यक्ष मोहनसिंह लालचनका अनुसार, जोमसोम–ठिनी–नमखुलेक हुँदै मसोकोन्दो पास पार गरेर तिलिचो ताल पुग्ने यो पदमार्ग विशेषत: आन्तरिक पर्यटकहरूका लागि उपयोगी भएको छ।

उनले भने, “गाउँपालिका र अन्नपूर्ण संरक्षण क्षेत्र आयोजना (एक्याप)ले निर्माण गरेको यस पदमार्गले पर्यटकहरूलाई दुई दिनमै तिलिचो तालसम्म पुग्ने अवसर दिएको छ।”

यो पदमार्गमा यात्राका क्रममा पर्यटकले नीलगिरि हिमाल, नमखु लेक, छेमा ताल, र मसोकोन्दो पासजस्ता आकर्षक प्राकृतिक स्थलहरूको अवलोकन गर्न सक्छन्। तिलिचो तालको उचाइ ४९१९ मिटर भए पनि, पर्यटकहरूले मसोकोन्दो पासको ५१२० मिटर उचाइ पार गर्नु पर्ने हुन्छ।

हालसम्म होटल र रेष्टुरेन्टको सुविधा नभएकाले यात्रुले आफैं खानेबस्ने सामग्रीको व्यवस्था गर्नुपर्ने हुन्छ। जोमसोमबाट दुई घण्टा सवारी र छ घण्टा पैदल यात्रा गरेर मेसोकोन्दो पास पुग्न सकिन्छ। त्यहाँबाट एक घण्टा थप पैदल यात्रा गरेपछि तिलिचो ताल पुगिन्छ।

यात्राका क्रममा हिमचितुवा, भेडा च्याङग्रा, चौरीको गोठ, र ठिनी गाउँको ऐतिहासिक र सांस्कृतिक सम्पदाहरू पनि आकर्षणको केन्द्रमा छन्। अन्नपूर्ण संरक्षण क्षेत्र आयोजनाले पदमार्गमा सूचनामूलक साइनबोर्डहरू, पर्यटकीय जानकारी, हाइअल्टिच्युड क्षेत्रका विशेषता, स्थान, र उचाइबारे जानकारीमूलक बोर्डहरू पनि राखेको छ।

आर्थिक वर्ष २०८०/०८१ का लागि घरपझोङ गाउँपालिकाले ५० लाख रुपैयाँ बजेट बिनियोजन गरी पदमार्गको मर्मत तथा स्तरोन्नति गरेको छ भने, एक्यापले थप १० लाख रुपैयाँ सहयोग गरेको छ।