खोज

जनकपुरधाममा मधेश सरकारले पहिलो पटक औपचारिक रूपमा संविधान दिवस मनाएको छ। गृह, सञ्चार तथा कानुन मन्त्रालयको आयोजनामा बिहीबार बिहान प्रभातफेरि गरिएको थियो। यो अवसरमा जनकपुरधामको रामानन्द चोकबाट सुरु भएको प्रभातफेरि नगरका विभिन्न भागमा यात्रा गर्दै महेन्द्रनारायण निधि मिथिला संकृति भवनको सभाहलमा पुगेर कोणसभामा परिणत भएको थियो।

प्रभातफेरिमा मुख्यमन्त्री सतिशकुमार सिंह, प्रदेश सरकारका मन्त्रीहरू, प्रदेश सांसद, सुरक्षा निकायका प्रमुख, कर्मचारी र विद्यार्थीहरूको सहभागिता थियो। नेपाल प्रहरी र सशस्त्र प्रहरी बलको ब्याण्डबाजासहित प्रभातफेरि सम्पन्न भयो।

कोणसभालाई सम्बोधन गर्दै मुख्यमन्त्री सिंहले संविधानले संघीयता, लोकतन्त्र र गणतन्त्रलाई ठूला उपलब्धिको रूपमा स्थापित गरेको भन्दै यसको रक्षा गर्दै थप सुधारको आवश्यकता रहेको बताए। संघीयता आइसकेपछि गाउँगाउँमा विकासका कामहरू अघि बढेको उनले तर्क गरे। मुख्यमन्त्री सिंहले प्रदेश सरकारलाई बलियो बनाए मात्र लोकतन्त्र र गणतन्त्रलाई मजबुत बनाउन सकिने धारणा राखे।

मधेश प्रदेशका गृह, सञ्चार तथा कानुनमन्त्री राजकुमार लेखीले वर्तमान संविधानले दिएको उपलब्धिहरूलाई संस्थागत गर्दै परिमार्जन गरी जनताको चाहनालाई सम्बोधन गर्नुपर्ने बताए। कार्यक्रममा सभामुख रामचन्द्र मण्डललगायत केही मन्त्रीहरू पनि सहभागी थिए।

यसअघि साढे ६ वर्षसम्म जनता समाजवादी पार्टी नेपाल नेतृत्वको सरकार रहेको बेलामा संविधान दिवस नमनाइएको थियो। जसपा नेपाल सरकारबाट बाहिरिएपछि मधेश सरकारले संविधान दिवस पहिलो पटक मनाएको हो।