खोज

३ असोज, बुटवल – लुम्बिनी प्रदेशका मुख्यमन्त्री चेतनारायण आचार्यले नागरिकहरुको बढ्दो आकांक्षालाई सम्बोधन गर्न राजनीतिक दलहरुमा एकता, समन्वय र सहकार्य आवश्यक रहेको बताएका छन्।

संविधान तथा राष्ट्रिय दिवस २०८१ को अवसरमा आयोजना गरिएको मुल समारोहलाई सम्बोधन गर्दै मुख्यमन्त्री आचार्यले लुम्बिनी प्रदेशलाई आत्मनिर्भर र समृद्ध बनाउन सबै सरोकारवाला निकायको जिम्मेवारीपूर्ण भूमिकाको आवश्यकता औंल्याए।

उनले योजना निर्माण र कार्यान्वयनको तहमा लुम्बिनी प्रदेश अग्रणी रहेको दावी गर्दै, आर्थिक वृद्धिसँगै शिक्षा, स्वास्थ्य, र पूर्वाधार क्षेत्रमा नागरिकको पहुँच बढेको बताए।

साझा अधिकार सूचीका कानुनहरू नबन्दा केही कठिनाइहरूको सामना गरिरहेको बताउँदै, मुख्यमन्त्री आचार्यले प्रदेश सरकारले संघीय सरकारसँग समन्वय गर्दै कानुन निर्माणमा तत्पर रहेको जानकारी दिए।

प्रदेशलाई भ्रष्टाचारमुक्त बनाउन र खर्चमा मितव्ययीता तथा सदाचारी शैलीको विकास गर्दै नागरिकका गुनासाहरुलाई समयमै सम्बोधन गर्न प्रतिबद्ध रहेको उनले भने।

कार्यक्रममा सभामुख तुलाराम घर्ती मगरले संविधानमा उल्लिखित अधिकारहरुको कार्यान्वयन गर्न तीन तहका सरकार बीच समन्वय र सहकार्यको आवश्यकता औंल्याए। निवर्तमान मुख्यमन्त्री जोखबहादुर महराले समतामूलक समाज निर्माण गर्न र संविधानको पूर्ण कार्यान्वयनमा सबैलाई एक ठाउँमा उभिनुपर्ने बताए।

पूर्वमुख्यमन्त्री डिल्लीबहादुर चौधरीले विनाप्रहरीको प्रदेश सरकार सम्भव नभएको भन्दै संविधानको पूर्ण कार्यान्वयनको आवश्यकता औंल्याए।

संविधान दिवसको अवसरमा राप्ती उपत्यकामा विभिन्न समुदायको कला संस्कृतिसहितको झाँकी प्रदर्शनी गरिएको थियो।