खोज

नेपाल उद्योग वाणिज्य महासंघले युवा, महिला तथा साना र मझौला उद्यमीहरूको विकासमा विशेष ध्यान दिन थालेको छ।

महासंघका अध्यक्ष चन्द्रप्रसाद ढकालले मङ्गलबार साँझ पत्रकारहरूसँगको छलफलमा महासंघले तयार गरेको ‘स्टार्टअप’ नीति पारित भएको जानकारी दिएका छन्। उनले तीन वर्षदेखि निरन्तर स्टार्टअप नेसन कार्यक्रम आयोजना गर्दै आएको र कैलालीमा प्रदेश सरकारसँग सहकार्यमा चाँडै ‘इन्कुवेसन’ केन्द्र स्थापना गरिने आश्वासन दिएका छन्।

साना र मझौला उद्यमीहरूको विकासका लागि ‘एसएमई’ केन्द्र महासंघमा स्थापना हुने र यसको प्रभावकारी सञ्चालनको तयारी भइरहेको उनले बताए। उद्योग र व्यवसायसँग सम्बन्धित विवाद समाधानका लागि महासंघमा मेलमिलाप केन्द्र स्थापनासम्बन्धी कार्यविधि तयार भएको जानकारी दिँदै, यसले व्यवसायीहरू बीचका विवाद समाधानमा मद्दत गर्ने अपेक्षा गरिएको छ।

उहाँले देशमा लगानीका विभिन्न सम्भावनाहरू रहेको, विशेष गरी जलविद्युत्, पर्यटन, उत्पादन, कृषि र भौतिक पूर्वाधारमा स्वदेशी लगानीकर्ताले पुँजी लगानी गर्न इच्छुक रहेको बताउनुभयो। साथै, नेपाल डेभलपमेन्ट पब्लिक लिमिटेड दर्ता भइ त्यसमा कम्तीमा ४० अर्ब पुँजी लगानी गरी विकास आयोजना सञ्चालन गर्न सकिने उल्लेख गरे।

“यो महासंघको कम्पनी होइन, तर यसका सदस्य र गैरसदस्यले पनि लगानी गर्न सक्ने कम्पनी हो। यसले बजारमा मनोबल बढाउने अपेक्षा गरिरहेको छ,” उहाँले थप्नुभयो।

हालको अर्थतन्त्रमा क्रमशः सुधार भएको भए पनि निजी क्षेत्रले सन्तोष व्यक्त गर्न नसकेको ढकालको भनाइ छ।

फरक प्रसङ्गमा उनले भने, “अख्तियारलगायतका निकायको भूमिका निजी क्षेत्रमा रहने कि नरहने विषयमा प्रष्टता आवश्यक छ। यदि केवल नियमन मात्र गरिन्छ भने लगानीकर्ता निरुत्साहित हुनेछन्। हामीले स्वच्छ र स्वस्थ व्यवसाय प्रवर्द्धन गर्नुपर्छ र उपभोक्ताप्रति जिम्मेवार व्यवसायलाई समर्थन गर्नुपर्छ। हाम्रा कमजोरीहरू छन् भने सुधार गर्नुपर्छ।”