खोज

१८ भदौ, धनगढी । गृह मन्त्री रमेश लेखकले सबै दलको सहमति जुटाएर नेपालको संविधान संशोधन गर्ने ठोस योजना अघि सारेका छन्। संघीय लोकतान्त्रिक गणतन्त्रात्मक शासन व्यवस्थालाई अझ सुदृढ र समावेशी बनाउने उद्देश्यसहित गृह मन्त्री लेखकले मंगलवार धनगढीमा आयोजित पत्रकार सम्मेलनमा संविधान संशोधनलाई प्राथमिकतामा राखेर आफू अघि बढ्ने बताएका हुन्।लेखकले भने, “संविधानका आधारभूत विषयहरूमा कुनै प्रतिरोध नहुने गरी संशोधनको तयारी गरिएको छ।

हाम्रो उद्देश्य भनेको समावेशी, सुदृढ, बलियो, र जनताका लागि प्रभावकारी हुने संविधान निर्माण गर्नु हो। यसका लागि सबै राजनीतिक दलको सहमति आवश्यक छ, र हामी चरणबद्ध छलफल गरेर अगाडि बढ्नेछौं।”पत्रकार सम्मेलनमा लेखकले संविधान संशोधनको लागि संविधानका सरलता र जटिलताको समीक्षा गरेर मात्र अगाडि बढिने स्पष्ट पारे। उनले भने, “संविधानको पहिलो ९-१० वर्षको अभ्यासबाट के के राम्रा भए र कहाँ कठिनाइहरू देखिए, ती सबैको गहन समीक्षा गरिनेछ।

यसपछि सबै दलसँग संवाद गरेर सहमतिको आधारमा संविधान संशोधनको प्रक्रिया अघि बढाइनेछ।”गृहमन्त्री लेखकले विगतमा नेपाली कांग्रेस र नेकपा एमालेले महत्वपूर्ण राजनीतिक परिवर्तनमा एकजुट भएर सफलता प्राप्त गरेको उल्लेख गर्दै, हालको अवस्थामा पनि दुवै दल स्थिर सरकार र समुचित राजनीतिक समीकरणका लागि मिलेर काम गरिरहेको बताए। उनले भने, “हामीले निरंकुश पञ्चायत व्यवस्थाविरुद्ध लड्दा र सशस्त्र संघर्षलाई शान्तिमा रूपान्तरण गर्दा कांग्रेस-एमाले एकजुट भएका थियौं।

अहिले पनि स्थिर सरकार र समृद्धि सुनिश्चित गर्न यस्तै सहकार्य आवश्यक छ।”संविधान संशोधनसँगै शिथिल भएको अर्थतन्त्रलाई चलायमान बनाउने, भ्रष्टाचार नियन्त्रण गर्ने, र सुशासन कायम गर्न पनि दुवै दलले मिलेर काम गरिरहेको लेखकले बताए। “स्थिर सरकारका लागि राजनीतिक स्थायित्व अपरिहार्य छ। हामी दुई-तीन महिनामा सरकार ढल्ने अवस्थाबाट देशलाई जोगाउन चाहन्छौं,” उनले थपे।लेखकको यो अभिव्यक्ति नेपालमा राजनीतिक स्थायित्व र स्थिर सरकारका लागि मार्गनिर्देशन हुनसक्ने आशा गरिएको छ, जसले समावेशी र जनउत्तरदायी शासनको मार्ग प्रशस्त गर्नेछ।