खोज

१८ भदौ, काठमाडौं । सञ्चार तथा सूचना प्रविधिमन्त्री पृथ्वीसुब्बा गुरुङले प्रहरी महानिरीक्षकविरुद्ध दिएको विवादास्पद अभिव्यक्तिपछि राजनीतिक माहोल तातिएको छ। नेपाली कांग्रेसका नेता शंकर भण्डारी र पूर्वप्रहरी संगठन प्रमुख मञ्चका सदस्यहरुले गुरुङलाई तत्काल कारबाही गर्न प्रधानमन्त्रीलाई आह्वान गरेका छन्।गत शनिबार पोखरामा आयोजित सार्वजनिक कार्यक्रममा मन्त्री गुरुङले प्रहरी महानिरीक्षकप्रति “जिभ्रो थुत्नुपर्ने” अभिव्यक्ति दिएका थिए।

यस अपमानजनक टिप्पणीले सरकारको प्रवक्ता र प्रहरी संगठनबीच तनाव बढाएको छ। शंकर भण्डारीले विज्ञप्ति जारी गर्दै भनेका छन्, “प्रहरी प्रमुखमाथि यस्तो अशोभनीय भाषा प्रयोग गर्ने मन्त्रीलाई तत्काल पदमुक्त गरिनुपर्छ।”भण्डारीले स्पष्ट पारेका छन् कि शान्ति सुरक्षामा खलल पुर्याउने र प्रहरी संगठनको प्रतिष्ठामा आँच आउने खालको अभिव्यक्ति सह्य हुन नसक्नेछ।

“यदि भविष्यमा शान्ति सुरक्षामा कुनै पनि समस्या आउँछ भने, त्यसको सम्पूर्ण जिम्मेवारी प्रधानमन्त्री र सरकारको हुनेछ,” भण्डारीले भने।यस्तै, पूर्वप्रहरी संगठन प्रमुख मञ्चले पनि विज्ञप्ति जारी गर्दै गुरुङको अभिव्यक्ति अस्वीकार्य भएको बताएको छ। मञ्चले भनेको छ, “मन्त्री गुरुङले तत्काल आफ्नो अभिव्यक्ति फिर्ता लिएर प्रहरी महानिरीक्षकसँग माफी माग्नुपर्छ। प्रधानमन्त्रीले यस्तो असंवेदनशील अभिव्यक्तिको उचित संज्ञान लिई गुरुङलाई कारबाही गर्नुपर्छ।”मञ्चका अनुसार, यस्तो घटनाले प्रहरी संगठनमा मात्र नभई समग्र सुरक्षा व्यवस्थामा अस्थिरता निम्त्याउने सम्भावना छ। मञ्चले सरकारलाई सुरक्षा क्षेत्रप्रति सम्मानजनक व्यवहार अपनाउन चेतावनी दिएको छ।