खोज

काठमाडौँ — २०८० को मदन पुरस्कार मोहन मैनालीको ‘मुकाम रणमैदान’लाई दिइने निर्णय भएको छ। शुक्रवारको मदन पुरस्कार गुठीको बैठकमा मदन पुरस्कार ‘मुकाम रणमैदान’लाई र जगदम्बा-श्री सम्मान प्रा.डा. योगेन्द्रप्रसाद यादवलाई दिने निर्णय गरिएको अध्यक्ष कुन्द दीक्षितले जानकारी दिए।

मैनालीको पाँचौँ पुस्तक ‘मुकाम रणमैदान’ नेपाल-अंग्रेज युद्धको इतिहासमा आधारित छ। यसअघि उनको ‘मान्ठा डराएको जुग’, ‘उपल्लो थलो’, ‘देखेको देश’, र ‘आकाशमुखी’ शीर्षकका पुस्तक प्रकाशित भएका छन्। यादव भाषाशास्त्री हुन् र उनले भाषासम्बन्धी विभिन्न पुस्तकहरूको सम्पादन गरेका छन्। उनी त्रिवि भाषा विज्ञान केन्द्रको प्रमुख र नेपाल प्रज्ञा प्रतिष्ठानको प्राज्ञको रूपमा काम गरिसकेका छन्।

यस वर्षको मदन पुरस्कारका लागि ५ वटा पुस्तकको सूची प्रकाशित गरिएको थियो: भक्त स्याङतानको ‘डम्फुको आत्मालाप’ (कथासंग्रह), जीवन क्षेत्रीको ‘नुन-तेल’ (गैरआख्यान), भावेश भुमरी र प्रणिता चामलिङको ‘भावलिपि’ (प्रेमपत्र संग्रह), मोहन मैनालीको ‘मुकाम रणमैदान’ (इतिहास), र रोशन थापा ‘नीरव’ को ‘सन्त्रासका साठी दिन’ (उपन्यास)। गुठीका अनुसार यस वर्ष ३०४ कृतिहरू प्राप्त भएका थिए।

पछिल्लो वर्षको जगदम्बा-श्री सम्मान टेकवीर मुखियालाई र मदन पुरस्कार विवेक ओझाको ‘ऐंठन’ उपन्यासलाई दिइएको थियो। २०४५ सालदेखि जगदम्बा-श्री र २०१३ सालदेखि मदन पुरस्कार प्रदान गर्दै आएको छ। दुवै पुरस्कारको राशि चार/चार लाख रुपैयाँ रहेको छ।