खोज

काठमाडौं, १४ भदौ । नेकपा (माओवादी केन्द्र) का अध्यक्ष र पूर्व प्रधानमन्त्री पुष्पकमल दाहाल ‘प्रचण्ड’ ले अहिले पार्टी नेतृत्व हस्तान्तरण गर्ने सम्भावना छैन भनेका छन्। शुक्रबार सुर्खेतमा प्रेस सेन्टरले आयोजना गरेको पत्रकार सम्मेलनमा प्रचण्डले पार्टीमा सक्षम टिम बनेपछि मात्र नेतृत्व हस्तान्तरण गर्ने कुरा उल्लेख गरे। उनले पार्टी उपमहासचिव जनार्दन शर्मासँगको वार्तामा पनि नेतृत्व हस्तान्तरणको विचार नगरेको बताए।

प्रचण्डले आफूलाई परिवर्तन र क्रान्तिको नेताको रूपमा स्वीकार गरिएकामा गर्व व्यक्त गर्दै पार्टीको स्थायी नेतृत्वको भूमिका निभाउनको चाहना नरहेको स्पष्ट पारे। उनले उमेर ७० वर्ष नाघ्दै गरेको भन्दै अब आफ्नो प्राथमिकता राम्रो टिम निर्माणमा केन्द्रित रहेको उल्लेख गरे।

“नेतृत्वको विषयमा निरन्तर छलफल भइरहन्छ। अहिलेको अवस्थामा नेतृत्व हस्तान्तरणको कुरा उपयुक्त देखिंदैन,” प्रचण्डले भने। उनले जनार्दन शर्माले पनि नेतृत्व परिवर्तनको कुनै प्रस्ताव नउठाएको बताएका छन्।

प्रचण्डले थपे, “मलाई नेतृत्वको स्थायी भूमिका चाहिएको छैन। देश र संसारले मलाई ठूलो परिवर्तनका नेता रूपमा स्वीकार गरेको छ। त्यसैले अध्यक्षको पद ठूलो हुनुपर्ने आवश्यकता छैन। म अब राम्रो टिम बनाउने सोचमा छु, र त्यसपछि अर्को भूमिकामा जान तयार छु।