खोज

काठमाडौं, ३० असार । रास्वपाका सभापति उपप्रधान एवम गृहमन्त्री लामिछानेलाई आज मन्त्रालयबाट बिदाइ गरिएको छन । नयाँ सत्ता समीकरण बनेर सरकार ढलेसँगै लामिछानेको गृहमन्त्री पद गुमेको थियो । मध्याह्न सिंहदरबारस्थित गृह  मन्त्रालयमा विशेष कार्यक्रम आयोजना गरी उनको बिदाई गरिएको छ ।

उक्त कार्यक्रममा गृह सचिव एकनारायण अर्याल, नेपाल प्रहरीका आइजीपी वसन्त कुँवर, सशस्त्रका आइजीपी राजु अर्याल, मुख्य अनुसन्धान निर्देशक हुतराज थापा, सिआइबी प्रमुख श्याम ज्ञवाली, मन्त्रालयका कर्मचारीलगायतकाे उपस्थिति थियो । गृहमन्त्री बनेर उनले  सिहंदरबारमा १३० दिन बस्न पाए । २०७९ सालको पुसमा पनि उनी गृहमन्त्री बने तर, सर्वोच्च अदालतले उनको नागरिकता खारेज गरेपछि करिब ३२ दिनमै गृहमन्त्री पद गुमेकाे थियो ।
दोस्रो पटक गृहमन्त्रीको कुर्सीमा पुगेका रवि सहकारी ठगीमा जोडिएकाे कुराले  लामो समय उक्त विषयमा विवाद भयो ।

यसैबीच लामिछानेले आफू पदमा नरहेपनि नजर भने २४ घण्टा गृहमन्त्रालयमा हुने बताएका छन् । जाँदा जाँदै पत्रकार सम्मेलन गरेर मन्त्री लामिछानेले भने‘जाँदा जाँदै म यति भन्न सक्छु । देशमा परिवर्तन चाहिएको भए, यदि जे चलिरहेको छ त्यो सही भइदिएको भए, जुन संयन्त्र चलिरहेको छ त्यही नै भइदिएको भए हामीले दैनिक गाली गलोज खाएर, आलोचना सहेर, अनेक किसिमका लाञ्छना सहेर यसरी नयाँ पुस्ता आउनुपर्ने थिएन ।’ लामिछानेले थप भने, ‘अर्थात नयाँ पुस्ताको यो आगमन व्यक्ति को हुन्छ थाहा छैन तर संयन्त्रका रूपमा राज्य संयन्त्रका रूपमा जर्वजस्त हस्तक्षेप गर्न नयाँ पुस्ताको आगमन भैसकेको छ ।’ उनले त्यसको महसुस प्रहरीलाई पनि होस् भन्दै प्रशासनलाई पनि हुनुपर्ने बताए ।