खोज

काठमाडौ । नेपालमा एन्टिमाइक्रोबियल प्रतिरोध (AMR) नियन्त्रण तथा एन्टिमाइक्रोबियल स्टेवार्डशिप (AMS) प्रवद्र्धन गर्न कमनवेल्थ फार्मासिस्ट्स एसोसिएसन (CPA) को नेतृत्वमा आयोजित ‘SPARC डाटा फर एक्सन’ तालिम सफलतापूर्वक सम्पन्न भएको छ। धुलिखेलमा १० र ११ मार्चमा सम्पन्न उक्त तालिममा देशभरका १८ प्रतिष्ठित स्वास्थ्य संस्थाका चिकित्सक, फार्मासिस्ट, नर्स, माइक्रोबायोलोजिस्ट, प्रयोगशाला विज्ञ, डेटा विश्लेषक तथा AMS नेतृत्वकर्ताहरू सहभागी भएका थिए।
एन्टिमाइक्रोबियल प्रतिरोध आधुनिक चिकित्सा विज्ञानका लागि गम्भीर चुनौती बनेको छ। सामान्यतया उपचार गर्न सकिने संक्रमणहरू समेत खतरनाक बन्न सक्ने अवस्थामा, AMS प्रभावकारी बनाउने उद्देश्यले यो तालिम सञ्चालन गरिएको थियो । CPA को ‘Surveillance and Prescribing Support for Antimicrobial Stewardship Resource Capacity Building (SPARC)’ कार्यक्रमअन्तर्गत सम्पन्न तालिममा डेटा-आधारित नीति निर्माण, प्वाइन्ट प्रेभालेन्स सर्वे (PPS) को प्रभावकारिता, र अस्पतालस्तरमा AMS हस्तक्षेपको दीर्घकालीन कार्यान्वयन जस्ता विषयमा गहन प्रशिक्षण प्रदान गरिएको SPARC कार्यक्रम प्रबन्धक ब्रिजेट केबिरुंगीले पब्लिक सवालसँग कुरा गर्दै भनिन्, “क्षमता विकास हाम्रा साझेदार देशहरूमा गरिने प्रत्येक पहलको केन्द्रमा रहन्छ। हाम्रो तालिमले स्वास्थ्यकर्मीहरूलाई आवश्यक सीप, विधि तथा आवश्यक सहयोग प्रदान गरेर उनीहरूलाई आफ्ना संस्थाहरूमा सकारात्मक तथा दिगो परिवर्तन ल्याउन सशक्त बनाउने लक्ष्य राख्छ।”
उनका अनुसार, यो तालिमले डेटा-आधारित निर्णय प्रक्रियालाई प्रवर्द्धन गर्दै, स्वास्थ्य संस्थाहरूलाई एन्टिमाइक्रोबियल औषधिको सही प्रयोग गर्न प्रेरित गर्नेछ। उनले पब्लिक सवालसँग कुरा गर्दै थपिन्, “हाम्रो उद्देश्य नेपालमा AMR विरुद्ध प्रभावकारी रणनीति लागू गर्न सहयोग पुर्‍याउनु हो।”
उनले पब्लिक सवालसंग भनिन्, “क्षमता विकास हाम्रो प्रमुख प्राथमिकता हो। यो तालिमले स्वास्थ्य संस्थाका व्यावसायिकहरूलाई वैज्ञानिक डेटा प्रयोग गरेर AMS सुधार गर्न सशक्त बनाउनेछ। हामी नेपालका १८ स्वास्थ्य संस्थाबाट आएका प्रशिक्षार्थीहरूलाई एन्टिबायोटिक औषधिको भविष्य सुरक्षित राख्ने अभियन्ता बनाउन चाहन्छौं।”
नेपालका लागि SPARC In-Country Consultant अनुप लुइटेलका अनुसार, “यो तालिमले स्वास्थ्यकर्मीहरूलाई PPS सञ्चालन गर्ने, डेटा विश्लेषण गर्ने, र रणनीतिक निर्णय लिन सक्षम बनाउनेछ, जसले भविष्यमा एन्टिबायोटिक औषधिको प्रभावकारिता सुनिश्चित गर्न मद्दत गर्नेछ।”
तालिममा त्रिभुवन विश्वविद्यालय शिक्षण अस्पताल, पाटन स्वास्थ्य विज्ञान प्रतिष्ठान, कान्ति बाल अस्पताल, कोशी अस्पताल, नारायणी अस्पताल, र धुलिखेल अस्पताल लगायतका १८ प्रमुख स्वास्थ्य संस्थाका प्रतिनिधिहरू सहभागी थिए।

फ्लेमिङ फण्डको आर्थिक सहयोगमा FHI 360 र नेपाल सरकार स्वास्थ्य तथा जनसंख्या मन्त्रालयको सहकार्यमा सम्पन्न यो तालिम AMR विरुद्धको लडाइँमा नेपाललाई सशक्त बनाउने अन्तर्राष्ट्रिय पहलको हिस्सा हो। SPARC कार्यक्रमले एसिया र अफ्रिकाका २२ देशमा AMS प्रणालीलाई मजबुत बनाउने उद्देश्य राखेको छ। SPARC तालिमले नेपालका स्वास्थ्य संस्थाहरूलाई वैज्ञानिक डेटा-आधारित रणनीति अपनाएर रोग प्रतिरोधी क्षमता घटाउने प्रयासलाई मजबुत बनाउन सहयोग पुर्‍याउने विश्वास गरिएको छ। AMS सुदृढीकरणका लागि यो कदम नेपालका स्वास्थ्य संस्थाहरूका लागि उदाहरणीय बन्नेछ।